“Veysəloğlu” Şirkətlər Qrupu “Bir damla qan, qurtarılan bir can” adlı növbəti qanvermə aksiyasını həyata keçirib. Şirkətlər qrupunun ictimaiyyətlə əlaqələr şöbəsindən verilən məlumata görə, aksiyanın məqsədi talassemiya xəstəliyindən əziyyət çəkən uşaqlara, eyni zamanda bədbəxt hadisələr nəticəsində xəsarət almış insanlara təmənnasız yardım etməkdən ibarətdir.

Respublika Mərkəzi Qan Bankının həkimlərinin nəzarətii ilə həyata keçirilən aksiyada şirkətlər qrupunun əməkdaşları donor qismində iştirak ediblər.

Xatırladaq ki, talassemiya dünyanın bir çox ölkəsində rast gəlinən irsi qan xəstəliyidir. Ümumdünya Səhiyyə Təşkilatının məlumatlarına görə, dünyada 300 milyona yaxın insan bu xəstəlikdən əziyyət çəkir. Talassemiya dünyada insanlarda ən çox müşahidə olunan tək gen pozğunluğudur. Bu xəstəliyin yaranmasının əsas səbəbi insanda olan 46 cüt xromosomdan 11-ci xromosomla 16-cı xromosomda baş verən qüsurdur.

Hər il dünyada milyonlarla insan belə xəstələrin tam sağalana qədər həyatda qalması üçün könüllü olaraq qanvermə aksiyalarına qoşulurlar.

Qabil Yusifoğlu,
“Xalq qəzeti”