Azərbaycan Tibb Universitetinin (ATU) stomatologiya fakültəsinin rəhbərliyi ilə qrup nümayəndələrinin görüşü keçirilib. Səhiyyə Nazirliyinin mətbuat xidmətindən bildiriblər ki, görüşdə fakültənin dekanı Səid Əhmədov, dekan müavini Kamran Babayev və fakültənin elmi məsləhətçisi Qələndər Aslanov iştirak ediblər.

    Səid Əhmədov tələbələrin dərslərə davamiyyəti haqqında danışaraq tələbələri dərslərinə qarşı daha məsuliyyətli olmağa çağırıb: “Unutmayın ki, sizin dərsə davamiyyətiniz imtahanlarda da böyük rol oynayır”. Dekan tələbələrə nizam-intizamla bağlı tövsiyələr, həmçinin imtahan prosesinin qayda və qanunları haqqında geniş məlumat verib.

     Fakültənin elmi məsləhətçisi Qələndər Aslanov da qrup nümayəndələrini təkcə dərslərində deyil, eyni zamanda, fakültənin ictimai işlərində aktiv olmağa dəvət edib.

    Sonda görüş müzakirələrlə davam edib. Tələbələrin sualları fakültə rəhbərliyi tərəfindən ətraflı cavablandırılıb.

Zərifə BƏŞİRQIZI,
“Xalq qəzeti”