Ölkəmizdə son illər ərzində neyrocərrahiyyə sahəsində bir sıra uğurlu əməliyyatlar icra edilib. Səhiyyə Nazirliyinin Mətbuat Xidmətindən aldığımız məlumatda bilirilir ki, növbəti uğurlu əməliyyat Respublika Müalicəvi Diaqnostika Mərkəzində (RMDM) həyata keçirilib.

     Hipofiz vəzinin nəhəng adenoması səbəbi ilə RMDM-ə müraciət edən 50 yaşlı qadının əsas şikayəti tədricən görmənin ciddi pisləşməsi olub. Bu barədə RMDM-in həkim-neyrocərrahı Azər Əkbərov məlumat verib: “Aparılan MRT müayinəsində nəhəng (37 mm) hipofiz adenoması aşkar edilib. Adenoma endoskopik yol ilə xaric edilib. Əməliyyatdan sonra 2-ci gün xəstə görmənin ciddi yaxşılaşmasını qeyd edib. 3 ay sonra çəkilən kontrol MRT-də isə görmə yollarının tam rahat olması diqqəti çəkib. Xəstənin görməsi bərpa olunub.”

A.Əkbərov daha bir uğurlu əməliyyatın həyata keçirilməsində birgə əməyi keçən hər kəsə təşəkkürünü çatdırıb.

Zərifə BƏŞİRQIZI,
“Xalq qəzeti”