“Parasetamol” cinsi hormonlara mənfi təsir göstərərək, sonsuzluq və qüsurlu döl inkişafı risklərini artırır. Belə bir nəticəyə San Dieqoda “Human Longevity” təşkilatının alimləri gəlib.

Xalqqazeti.com Oxu.Az portalına istinadən xəbər verir ki, bu barədə “The San Diego Union Tribune” jurnalında məqalə dərc olunub.

Tədqiqatda yaşı 18-dən yuxarı olan 455 nəfər iştirak edib. Təhlil prosesinə Avropada yaşayan 1880 əkiz, 1235 afroamerikalı və ispan əsilli insanların müayinəsi ilə bağlı tibbi məlumatlar daxil edilib. Alimlər metabolizm üçün zəruri olan 700 birləşmənin miqdarındakı dəyişikliklərin monitorinqini aparıblar.

Nəticədə bütün könüllü qruplarında “Parasetamol”dan istifadə ilə əlaqədar neyrosteroid cinsi hormonların tükənməsi müşahidə olunub. Effekt hormonal səviyyədə orqanizmin 35 il müddətinə qocalmasına bərabər olub.

Preparat, eyni zamanda, cift və reproduktiv orqanlarda pozuntulara yol açır. Bundan savayı, “Parasetamol” sinir sistemi ilə bağlı xəstəliklərə yol açır, uşağın erkən doğumu və embrion inkişafı pozuntuları riskini artırır.

                                                                                     Anar TURAN,
                                                                                     “Xalq qəzeti”