Səhiyyə Nazirliyinin Analitik Ekspertiza Mərkəzinin (AEM) "Dərmanların keyfiyyətinin yoxlanılması laboratoriyası"na Standartlaşdırma, Metrologiya və Patent üzrə Dövlət Komitəsinin Dövlət Akkreditasiya Xidməti tərəfindən laboratoriyanın dərman vasitələrinin sınağının həyata keçirilməsi üçün Akkreditasiya attestatı verilib.

Laboratoriya QİÇS, Vərəm və Malyariya ilə mübarizə üzrə Global Fond, həmçinin Ədliyyə Nazirliyinin Penitensiar Xidməti ilə sıx əməkdaşlıq edərək, ölkə ərazisinə idxal olunan antiretrovirus və vərəm əleyhinə preparatların keyfiyyətini yoxlayır. Hazırda Tacikistan və Qırğızıstan respublikalarına Global Fond layihələri çərçivəsində idxal olunan vərəm əleyhinə preparatların AEM-in Dərmanların keyfiyyətinin yoxlanılması laboratoriyasında analiz edilməsi üçün danışıqlar aparılır.

Laboratoriya müxtəlif dövlət qurumları, eləcə də hüquq-mühafizə orqanları ilə sıx əməkdaşlıq edir. Hazırda Korrupsiyaya qarşı Mübarizə Baş İdarəsi tərəfindən bəzi əczaçılıq obyektlərindən müsadirə edilən dərman vasitələri laboratoriyada yoxlanılır. Müəssisənin maddi-texniki bazasının daha da yaxşılaşdırılması məqsədilə Səhiyyə Nazirliyinin dəstəyi ilə yeni avadanlıqlar sifariş verilib və yaxın günlərdə müəssisəyə gətirilərək quraşdırılacaqdır. Mikrobioloji laboratoriyanın genişləndirilməsi və şəraitinin daha da yaxşılaşdırılması üçün hazırda müvafiq şirkətlərlə danışıqlar aparılır. Gələcəkdə də laboratoriya maddi-texniki bazasını daha da genişləndirmək, müxtəlif laboratoriyalararası peşəkarlığın yoxlanılması sınaqlarında iştirak etmək niyyətindədir. Bununla yanaşı, laboratoriyanın yaxın gələcək üçün əsas məqsədlərindən biri Ümumdünya Səhiyyə Təşkilatının tövsiyə etdiyi prekvalifikasiya olunmuş laboratoriyaların siyahısına daxil olmaqdır.

Mərkəzin "Dərman vasitələrinin idxal-ekspertiza şöbəsi"nin strukturunun təkmilləşdirilməsi şöbənin fəaliyyətinə nəzarəti gücləndirib. Dərman vasitələrinin idxalı zamanı sənədlərdə aşkar olunan çatışmazlıqlar barədə idxalçı müəssisələrin məsul şəxsləri məlumatlandırılır. Dərman vasitələrinin istifadə təlimatında aşkar edilmiş çoxsaylı nöqsanlarla bağlı cari ilin iyun ayında 60-a yaxın idxalçı müəssisənin nümayəndələri ilə qarşılıqlı fikir mübadiləsi aparılıb. İdxal olunan dərman vasitələrinin saxlanc yerləri barədə 40-a yaxın topdansatış əczaçılıq subyektinin nümayəndəsi ilə keçirilən görüşdə dərman vasitələrinin saxlanıldığı yerlərlə bağlı aşkar olunan nöqsanlar bildirilib və aradan qaldırılmayacağı təqdirdə müvafiq tədbirlərin görüləcəyi barədə müəssisələrə xəbərdarlıq edilib.

Nazirliyin mətbuat xidmətindən bildirirlər ki, dərmanların keyfiyyətinə daha ciddi nəzarət edilməsi məqsədilə gələcəkdə dərman vasitələrinin saxlanıldığı yerin temperatur, rütubət və dərmanların keyfiyyətinə təsir edən digər amillər barədə məlumatlar xüsusi ötürücü qurğular vasitəsilə mərkəzə ötürüləcəkdir. Hazırda "Dərman vasitələrinin Azərbaycan Respublikasına idxalına rəy verilməsi Qaydaları"nın layihəsi hazırlanır və yaxın günlərdə təsdiq edilməsi üçün Səhiyyə Nazirliyinə təqdim ediləcəkdir.

Zərifə BƏŞİRQIZI,
"Xalq qəzeti"