Ürək damar xəstəlikləri insan ölümünə ən çox səbəb olan xəstəliklərdir. AzərTAc xəbər verir ki, bu sözləri 3-cü “Bakı ürək günləri” Beynəlxalq konqresində Azərbaycan Ürək-Damar Cərrahiyyəsi Cəmiyyətinin (AÜDCC) sədri Kamran Musayev jurnalistlərə müsahibəsində demişdir.

K.Musayev bildirmişdir ki, bu konqres azərbaycanlı tibb işçilərinə dünyanın ən qabaqcıl mütəxəssisləri ilə kardiologiya elmləri sahəsində son nailiyyətləri müzakirə etmək və elmi-praktik təcrübə mübadiləsi aparmaq imkanı verəcəkdir.

Sədr diqqətə çatdırmışdır ki, bu konqresdə ilk dəfə ürək-damar cərrahiyyəsinin elmi-praktik məşğələsi keçiriləcəkdir.

K.Musayev heyvan ürəkləri üzərində təşkil ediləcək “Ürəyin cərrahi anatomiyası” mövzusunda elmi-praktik məşğələnin xüsusilə gənc mütəxəssislər üçün  çox faydalı olacağına əminliyini vurğulamışdır.