Avropa Komissiyasının Azərbaycanın Avropa Qonşuluq Siyasətinin həyata keçirilməsinə dair Tərəqqi Hesabatında səhiyyə sahəsində olan irəliləyişlər də göstərilmişdir.
Səhiyyə Nazirliyindən verilən məlumata görə, Avropa Komissiyasının Avropa Parlamenti və Şurasına müraciətini müşayiət edən sənədin səhiyyəyə aid bölməsində Azərbaycanda səhiyyə sektorunun təşkilati strukturunun təkmilləşdirilməsi, keyfiyyətinin artırılması və səmərəliliyini yüksəltməyə yönəlmiş islahatların davam etdiyi, əhalinin həssas qruplarına və regionlarda tibbi xidmətlərin göstərilməsinin təkmilləşdirilməsi bildirilir.
Eyni zamanda, vurğulanır ki, 2008-2012-ci illəri əhatə edən müddət üçün ölkədə " Səhiyyənin maliyyələşdirilməsinin təkmilləşdirilməsi və icbari tibbi sığortanın tətbiqi konsepsiyasının" icrası davam etməkdədir. Əvvəlki illə müqayisədə Azərbaycanda səhiyyə sektoruna çəkilən xərclər əhəmiyyətli dərəcədə artmışdır.
İnfeksion xəstəliklərə qarşı mübarizəyə hazırlıq planının və geniş masştablı immunizasiya proqramı yoluxucu xəstəliklərə, xüsusilə A(H1N1) qripinə qarşı mübarizə üzrə bir sıra tədbirlər görülmüşdür. Azərbaycanda HİV/AİDS və vərəm kimi yoluxucu xəstəliklərin törətdiyi təhlükələrin və nəticələrin aradan qaldırılmasına dair mübarizə tədbirləri davam edir.
2009-cu ildə Avropa İttifaqı tərəfindən Səhiyyə İnformasiya Komitəsi yaradılmışdır. Avropa Komissiyası Azərbaycanı yeni yaradılmış bu komitənin işində iştirak etməyə dəvət etmişdir.