Avstraliyalı alimlər bununla bağlı araşdırma aparıb. Araşdırma zamanı bağırsaqlarda sinxron şəkildə işləyən bir beynin mövcud olduğu qənaətinə gəlinib. Avstraliyalı tədqiqat qrupu bağırsaqların beyindən və onurğa iliyindən müstəqil olaraq işlədiyini açıqlayıb. Onların fikrincə, bağırsaqlar yaydığı elektrik dalğası ilə qidaların həzm sistemində fəaliyyətini təmin edir və bütün bunları sinxron şəkildə həyata keçirən isə bədəndəki ikinci beyindir. Alimlər ikinci beynin kəşfi ilə bağırsaqların qarışıq quruluşunu daha yaxşı anladıqlarını bildirib. Bu barədə  day.az məlumat yayıb.

Bağırsaq sinir sistemi bağırsaqların hərəkətinə nəzarət edən milyonlarla neyrona malikdir. Lakin bu mexanizm bu vaxta qədər alimlərin diqqətindən qaçıb.

Bu mexanizmin anlaşılması üçün Flinders Universitetinin bir qrup alimi öldürdükləri siçanın qalın bağırsağındakı 400 min neyronu incələyib. Alimlərin fikrincə, bu araşdırma bağırsaq xərçəngi kimi xəstəliklərin müalicəsinə kömək edəcək.

M.MÜKƏRRƏMOĞLU,
“Xalq qəzeti”