Dəniz kələmi ən faydalı bitkilərdən biri hesab edilir Buna səbəb dəniz kələminin tərkibinin yod, manqan, kobalt, fosfor, dəmir və kaliumla kimi vitaminlərlə zəngin olmasıdır.

Alimlər bildirirlər ki, dəniz kənarında yerləşən ölkələrin əhalisinin mətbəxində ondan geniş istifadə olunur. Dünyanın əksər ölkələrində dəniz kələmindən müxtəlif xörəklərin hazırlanmasında istifadə edilir.

Dəniz kələmi çiy, qurudulmuş, qaxac edilmiş, konservləşdirilmiş və duzlu halda yeyilir. Onu həm də əvəzsiz pəhriz qidası adlandırırlar. Əsasən ateroskleroz, hipertoniya, raxit, qalxanvarı vəzin müalicəsi və profilaktikası zamanı bu bitkidən geniş istifadə edilir.

Tədqiqatçılar qeyd edirlər ki, dəniz kələmi orqanizmdə maddələr mübadiləsini yaxşılaşdırır, radioaktiv maddələrin bədəndən xaric edilməsinə müsbət təsir göstərir, mədə-bağırsaq sisteminin fəaliyyətini tənzimləyir. Həmin xəstəliklərin müalicə və profilaktikası üçün gündə beş xörək qaşığı dəniz kələmi və yaxud gündə bir neçə dəfə olmaqla iki çay qaşığı onun qurudulmuş formasını qəbul etmək məsləhətdir.

Elçin ABABSOV,
“Xalq qəzeti”