Tahir Əzizovun 64 yaşı var. İki övladı, üç nəvəsi olan Tahir müəllim bu yaşadək səhhətindən şikayətçi olmayıb. Həmsöhbətim bir ay öncə ürəyində narahatlıq hiss edib. Deyir, heç ağlıma belə gəlməzdi ki, ürəyim sözümə baxmaz.

"Son günlər isə yolu keçirdim, gördüm ürəyim çox döyünür. Evim də yoxuşda olduğundan gördüm qalxanda çətinlik çəkirəm, nəfəsim çatmır. Gördüm ağrılar olur, yorğunluğum artır. Evdə sakitləşdirici ürək dərmanları qəbul etdim. Amma gördüm ki, ürəyimdə möhkəm narahatlıq var. Bundan sonra isə həkimə müraciət etmək qərarına gəldim"- deyir Tahir Əzizov.

Mütəxəssislər müayinə zamanı Tahir Əzizovun ürəyində ciddi problem yaşandığını aşkarlayıb və dərhal əməliyyat olunmasını məsləhət görüblər. O, Azərbaycan Ürək-Damar Cərrahiyyəsi Cəmiyyətinin sədri, Mərkəzi Klinik Xəstəxananın baş həkimi, tibb elmləri doktoru Kamran Musayevə müraciət edib.

Xəstənin ürəyində unikal cərrahiyyə əməliyyatı keçirən Kamran Musayev bildirir ki,  

Tahir müəllimin üzərində apardığımız əməliyyatın xüsusiyyəti ondan ibarətdir ki, biz eyni seansda beş fərqli ürək əməliyyatı icra etdik:” Normalda biz ürək əməliyyatlarında bir problemi həll edirik. Məsələn, ürək damarlarını dəyişirik və ya ürək qapaqlarının üzərində əməliyyat icra edirik. Yaxud da hansısa ürəkdəki qüsuru aradan qaldırırıq. 

Pasiyentin sağlıq durumu ağır idi. Əməliyyat səkkiz saat çəkdi. 

Ürəyindəki problemlər onu tələb edirdi ki, biz bir yox, məhz 5 əməliyyatı birdən edək. Ürəyin iki qapağı tamamilə kirəcləşmiş , daşlaşmış vəziyyətdə idi. Biz bunu əməliyyat etdik. Ürəyin hər iki qapağını dəyişdirdik. Bu problemlərinin fonunda yaranmış aritmiyanı ləğv etdik. Ürəyin qulaqcıqlararası çəpərində dəlik-deşik vardı, biz onu da ləğv etdik. Problemin gecikdirilməsindən yaranan aorta damarında aortanevrizma əmələ gəlmişdi. Ona görə pasiyentin qalxan aortasını da protezləşdirdik. 

Həm yerli təcrübədə, həm də dünya təcrübəsində bir seansda beş fərqli  əməliyyatın aparılması nadir rast gəlinən hallardandır. Bu gün çox sevincliyik ki, xəstəmizin üzərində icra etdiyimiz mürəkkəb əməliyyatlar toplusu uğurla nəticələndi və bu gün  artıq Tahir  müəllim evə buraxılacaq".

Mütəxəssisin sözlərinə görə, hazırda ölkəmizdə hər il 8-10 min nəfər insanın ürək-damar əməliyyatına ehtiyacı olur.

“Xalq qəzeti”