“Səyyar kitabxana” layihəsinin növbəti mərhələsinə start verilib. Layihə Azərbaycan Tələbə Gənclər Təşkilatları İttifaqının (ATGTİ) Gənclər və İdman Nazirliyinin dəstəyi ilə həyata keçirilir.

Bu münasibətlə keçirilən tədbirdə gənclər və idman nazirinin müavini İntiqam Babayev çıxış edərək layihənin əhəmiyyətindən danışıb. Nazir müavini bildirib ki, məqsəd gənclərin kitab oxumağa marağını artırmaq və onların kitab və elektron kitab vəsaitləri ilə təmənnasız təmin olunmasını təşkil etməkdir.

Qeyd edək ki. Heydər Əliyev Fondunun vitse-prezidenti Leyla xanım Əliyevanın iştirakı ilə açılışı həyata keçirilmiş layihə 2013-2017–-ci illərdə Gəncə, Mingəçevir, Lənkəran, Şəki, Şirvan, Quba, Astara, Bərdə, Qazax, Tovuz, Sabirabad, Zaqatala, Şamaxı, Göyçay, Cəlilabad, Biləsuvar, Qusar, Xaçmaz, Gədəbəy, Şəmkir, Qəbələ, İsmayıllı, Naftalan, Balakən, Qax rayon və şəhərlərində uğurla reallaşdırılıb, minlərlə oxucunu əhatə edib.

“Səyyar kitabxana” layihəsi çərçivəsində xüsusi yük maşınında fəaliyyət göstərən kitabxanada beş min kitab və on min elektron nəşr olmaqla yanaşı, xüsusi proqramda nəşrlərin elektron kataloqu da yerləşdirilib. Səkkiz bölmədə fəaliyyət göstərən kitabxanada Azərbaycan, rus, ingilis və türk dillərində nəşrlər yer alıb.

Ü.VAHİDQIZI,
“Xalq qəzeti”