Fevralın 25-də Bakı Dövlət Universitetində (BDU) Xocalı soyqırımının 19-cu ildönümü ilə bağlı tədbir keçirilmişdir.
Tədbiri BDU-nun rektoru, akademik Abel Məhərrəmov açmış, Xocalı şəhidlərinin xatirəsi bir dəqiqəlik sükutla yad edilmişdir.
Rektor Xocalı faciəsinin nəticələri barədə danışmış, bunun insanlıq tarixində ən amansız terror hadisəsi olduğunu qeyd etmişdir. Soyqırımın ermənilərin etnik təmizləmə siyasətinin bir hissəsi olduğunu bildirən rektor tariximizi yaxşı öyrənməyin vacibliyini vurğulamışdır. Erməni qəsbkarlarının törətdikləri vəhşiliklər nəticəsində xocalıların 50 faizinin məhv edildiyini xatırladan A. Məhərrəmov ümummilli lider Heydər Əliyevin hakimiyyətə qayıdışından sonra bu hadisəyə siyasi-hüquqi qiymət verildiyini, xalqımızın haqq səsinin dünyaya bəyan olunduğunu diqqətə çatdırmışdır.
BDU-nun "Gənc istedadlar" liseyinin şagirdləri "Xocalı uşaqların gözü ilə" adlı ədəbi-bədii kompozisiya təqdim etmişlər.
Tələbələr Xocalıya həsr olunmuş şeirlərdən parçaları BDU-da tədris olunan 14 dildə səsləndirmişlər. Həmçinin universitet tələbələri Xocalının tarixi, coğrafi ərazisi, bitki və heyvanat aləmi haqqında məlumat vermişlər.
Tədbirdə xocalıların müsibətlərini əks etdirən videoçarx göstərilmişdir.