AMEA Hüseyn Cavidin Ev muzeyində Bakı şəhər 6 nömrəli məktəb-liseyin şagirdləri üçün “açıq dərs” təşkil edib.

www.science.az saytının məlumatına görə, “açıq dərs”də məktəblilərə Azərbaycan ədəbiyyatının görkəmli nümayəndəsi, böyük dramaturq və filosof-şair Hüseyn Cavidin həyat və yaradıcılığı, o cümlədən Cavidlər ailəsi haqqında ətraflı məlumat verilib. Bundan əlavə, “açıq dərs”də H.Cavidin ümumbəşəri problemləri işıqlandıran mənzum faciələri və tarixi dramları, eləcə də muzeyin nəşrləri - “Cavidşünaslıq” araşdırmalar toplusu, “Turan Cavidin ömür salnaməsi”, “Azərbaycan qeyri-maddi mədəniyyət abidələri və Ərtoğrol Cavid” barədə də danışılıb.

Daha sonra şagirdlər muzeyin zəngin eksponatları və geniş ekspozisiyası ilə yaxından tanış olublar.

Vaqif BAYRAMOV,

”Xalq qəzeti”