Azərbaycan Milli Elmlər Akademiyasının (AMEA) İqtisadiyyat İnstitutunda "Müstəqil Azərbaycanın inkişafı rəqəmlərdə" mövzusunda elmi simpozium keçirilmişdir.
İnstitutun direktoru, professor İsa Alıyev Prezident İlham Əliyevin sərəncamı ilə təsdiq edilmiş "Azərbaycan Respublikasının dövlət müstəqilliyinin bərpasının iyirminci ildönümü ilə bağlı Tədbirlər Planı" haqqında məlumat vermişdir. Ötən əsrin sonlarında xalqımızın ikinci dəfə əldə etdiyi dövlət müstəqilliyinin əhəmiyyətini vurğulayan İ.Alıyev Azərbaycanın qısa müddətdə sürətlə, dinamik inkişaf edən ölkəyə çevrilməsində ümummilli lider Heydər Əliyevin misilsiz xidmətlərindən danışmışdır. Müstəqillik illərində keçilən zəngin inkişaf yolu, qazanılan nailiyyətlərin təbliğinin təmin olunması məqsədi ilə fundamental məqalələrin dərc edilməsi və tədbirlərin keçirilməsini AMEA-nın bölmələri qarşısında bir vəzifə kimi qoyulmasından, bununla bağlı institutda görüləcək işlərdən bəhs etmişdir.
Tədbirdə "Azərbaycan Respublikasının dünya iqtisadiyyatına inteqrasiyası", "Müstəqillik illərində Azərbaycanın sosial-iqtisadi inkişaf yolu", "Müstəqillik illərində Azərbaycan sənayesində transformasiya proseslərinin reallıqları", "Müstəqil Azərbaycanın investisiya siyasəti" və digər mövzularda məruzələr dinlənilmişdir. Natiqlər ölkəmizdə gedən quruculuq işlərində elm adamlarının, xüsusən də iqtisadçı alimlərin üzərinə böyük vəzifələrin düşdüyünu vurğulamışlar.
Mövzular ətrafında müzakirələr aparılmışdır.

AzərTAc