Azərbaycan Milli Elmlər Akademiyasında (AMEA) görkəmli alim, fizika-riyaziyyat elmləri doktoru, bacarıqlı elm təşkilatçısı, ictimai xadim, akademik Fəraməz Maqsudovun 80 illik yubileyinə həsr olunmuş “Spektral nəzəriyyə və onun tətbiqi” mövzusunda beynəlxalq konfrans keçirilir.

Əvvəlcə tədbir iştirakçıları Fəxri Xiyabanda alimin xatirəsini yad etmiş, məzarı üstünə gül dəstələri düzmüşlər.

Azərbaycan, Türkiyə, Rusiya Federasiyası, ABŞ, Özbəkistan və digər ölkələrdən olan alim və mütəxəssislərin iştirak etdiyi beynəlxalq konfransda AMEA-nın prezidenti, akademik Mahmud Kərimov, Fizika-Riyaziyyat və Texnika Elmləri Bölməsinin akademik-katibi, akademik Akif Hacıyev çıxış edərək Fəraməz Maqsudovun mənalı ömür yolundan, zəngin elmi yaradıcılığından, geniş ictimai fəaliyyətindən, qazandığı nailiyyətlərdən danışmışlar.

F.Maqsudov 1930-cu ildə Naxçıvanda anadan olmuşdur. O, 1954-cü  ildə Azərbaycan Dövlət Universitetinin fizika-riyaziyyat fakültəsini bitirmiş və Azərbaycan Elmlər Akademiyasında elmi fəaliyyətə başlamışdır. 1959-cu ildə namizədlik, 1974-cü ildə doktorluq dissertasiyası müdafiə etmişdir. Alim 1976-cı ildə Azərbaycan Elmlər Akademiyasının müxbir üzvü, 1980-ci ildə həqiqi üzvü seçilmişdir. O, 1995-ci ildə Azərbaycan Respublikası Milli Məclisinə deputat seçilmişdir.

Dəyərli elmi əsərlərin müəllifi olan F.Maqsudov uzun illər Azərbaycan Elmlər Akademiyasının Riyaziyyat və Mexanika İnstitutuna, Fizika-Riyaziyyat və Texnika Elmləri Bölməsinə rəhbərlik etmiş, 1997-ci ildə akademiyanın prezidenti seçilmişdir.

Ölkəmizdə riyaziyyat elminin inkişafında, elmi kadrların hazırlanmasında, Azərbaycan Elmlər Akademiyasının beynəlxalq əlaqələrinin genişləndirilməsində F.Maqsudovun mühüm xidmətləri olmuşdur. Onun ayrı-ayrı ölkələrdə keçirilən beynəlxalq konfranslarda məruzələri böyük maraqla qarşılanmışdır.

Akademik F.Maqsudov respublikamızın ictimai-siyasi həyatında da fəallıq göstərmişdir. O, səmərəli elmi və ictimai fəaliyyətinə görə  yüksək mükafatlara, o cümlədən “İstiqlal” ordeninə layiq görülmüşdür.

Akademiklər Telman Əliyev, İsa Həbibbəyli, təhsil naziri Misir Mərdanov, ayrı-ayrı ölkələrdən olan alimlər də Fəraməz Maqsudovun elmə verdiyi dəyərli töhfələrdən, ictimai-siyasi fəaliyyətinin əhəmiyyətindən bəhs etmişlər.  

Sonra riyaziyyat və mexanikanın müxtəlif sahələrinə dair məruzələr dinlənilmiş, müzakirələr aparılmışdır.

Beynəlxalq konfrans martın 19-da başa çatacaqdır.