Paytaxt məktəblisi şahmat üzrə beynəlxalq yarışda birinci yerə layiq görülüb.

Təhsil Nazirliyindən verilən məlumatda bildirilir ki, Bakı Şəhəri üzrə Təhsil İdarəsinin tabeliyindəki 308 nömrəli tam orta məktəbin IX sinif şagirdi Gövhər Beydullayeva Rusiyanın Moskva şəhərində 11 ölkəni təmsil edən 14 yaşadək olan şahmatçılar arasında keçirilən turnirdə bütün rəqibləri üzərində qələbə qazanıb.

G.Beydullayeva kubok, medal və diplomla təltif olunub.

Qeyd edək ki, G.Beydullayeva şahmat üzrə 2012-2017-ci illər ərzində 5 dəfə Azərbaycan çempionu olub. O, Avropa çempionatlarında 2013-cü və 2017-ci illərdə birinci, 2014-cü və 2015-ci illərdə ikinci yeri tutub. “Baku Open-2017” və “Naxçıvan Open-2017” beynəlxalq şahmat festivallarında qadınlar arasında  birinci yerə layiq görülüb. Məktəbli Respublika Şahmat Olimpiadasında dəfələrlə qalib olub.

G.Beydullayeva şahmat üzrə idman ustasıdır.

Samirə Əliyeva,
“Xalq qəzeti”