Milli Aviasiya Akademiyasında (MAA) bu ali təhsil ocağının tələbə gənclər təşkilatı “Müasir gəncliyin gücü” mövzusunda tədbir keçirmişdir.

Gənclərin ictimai fəallığına həsr olunan tədbir “Aviatorlar” himni ilə başlamışdır.

Mərasimdə təhsil nazirinin müavini Elmar Qasımov akademiyanın tələbə gənclər təşkilatının fəaliyyətini yüksək qiymətləndirmişdir. Gənclər təşkilatlarının ölkəmizin  ictimai-siyasi həyatında böyük rolunu qeyd edən E.Qasımov,  Azərbaycan Prezidenti İlham Əliyevin diqqət və qayğısı ilə gənclər siyasəti sahəsində görülən işlərdən danışmışdır. Azərbaycan aviasiya məktəbinin şanlı ənənələrini diqqətə çatdıran  nazir müavini, peşəkar aviatorların yetişməsində MAA-nın xidmətlərini xüsusi vurğulamışdır.

Milli Məclisin deputatı Elmira Axundova Azərbaycan aviasiyasının son illər qazandığı uğurları qeyd etmiş, bu istiqamətdə MAA-nın rektoru, akademik Arif Paşayevin böyük xidmətlərini nəzərə çarpdırmışdır. Gənclərin hərbi vətənpərvərlik, sağlam mənəvi dəyərlərə söykənən cəmiyyətdə böyüməsinə xüsusi diqqət yetirilməsinin vacibliyi vurğulanmışdır.  

Akademiyanın prorektoru Ədalət Səmədov akademik Arif Paşayevin gərgin əməyi sayəsində MAA-nın maddi-texniki bazasının təkmilləşdirildiyini, bu təhsil ocağında yeni tədris korpuslarının tikildiyini, müasir tələblərə cavab verən laboratoriyaların qurulduğunu, yeni ixtisasların açıldığını və hazırda burada beş fakültə və iyirmi kafedranın fəaliyyət göstərdiyini söyləmişdir. Bildirmişdir ki, bu ali təhsil ocağında MDB məkanında bənzəri olmayan müasir “Boeing”, “Aerobus” tipli təyyarələrin trenajorları quraşdırılacaqdır. Hazırda bir sıra xarici ölkələrin mülki aviasiya təşkilatlarından kursantların Azərbaycan Milli Aviasiya Akademiyasında təhsil almaları ilə bağlı müraciətlər daxil olur. Gələcək planlardan danışan Ə.Səmədov akademiyanın regional mərkəzə çevriləcəyini də söyləmişdir.

Bakı Şəhər Gənclər və İdman Baş İdarəsinin rəisi Raqif Abbasov ölkəmizdə dövlət gənclər siyasətinin uğurla icra olunduğunu bildirmiş, tələbə gənclər hərəkatının respublikamızın ictimai həyatında  rolunu, o cümlədən  MAA Tələbə Gənclər Təşkilatının  fəaliyyətini yüksək  dəyərləndirmişdir.  

R.Abbasov tələbə gənclər təşkilatına göstərdiyi dəstək və köməyə görə MAA-nın rektoru, akademik Arif Paşayevin “İlin ən yaxşı rektoru” seçildiyini diqqətə çatdırmış və müvafiq sənədi prorektor Ə.Səmədova təqdim etmişdir.  

Gənclərlə iş sahəsində əldə edilən uğurlara görə  akademiyanın tələbə gənclər təşkilatı  “Ən fəal tələbə gənclər təşkilatı” nominasiyasında  Fəxri fərmanla təltif olunmuşdur.