Şimali Kiprin Doğu Akdeniz Universitetinin (DAU) rektoru, professor Abdullah Öztoprak ölkəmizdə səfərdədir.
Səfər çərçivəsində Kiprin və Avropanın qabaqcıl universitetlərindən birinə rəhbərlik edən doktor A.Öztoprakın dövlət strukturları, müxtəlif ali təhsil müəssisələri və tələbələrlə görüşləri nəzərdə tutulmuşdur.
Yanvarın 25-də doktor A.Öztoprak Azərbaycan Müəllimlər İnstitutunda (AMİ) olmuş, rektor Aqiyə Naxçıvanlı ilə görüşmüşdür. Görüşdə qarşılıqlı əməkdaşlıq perspektivləri, ikitərəfli münasibətlərin genişləndirilməsi məsələləri müzakirə olunmuşdur.
Doktor A.Öztoprakın AMİ-nin tələbə və müəllim heyəti ilə görüşündə DAU-da təhsil perspektivləri mövzusunda müzakirələr aparılmışdır. Qeyd olunmuşdur ki, hazırda DAU modern ali təhsil ocağı olaraq Beynəlxalq Universitetlər Assosiasiyasının, İslam Ölkələri Universitetlər Federasiyasının və Avropa Universitetlər Assosiasiyasının üzvüdür.
DAU-nun ölkəmizdə rəsmi nümayəndəsi olan Azərbaycan Tələbələr Birliyinin (ATB) müxtəlif universitetlərdə təhsil alan fəal üzvləri tədbirdə iştirak etmişlər. DAU-nun rektoruna ATB-in fəaliyyəti barədə məlumat verilmişdir. Rektor tələbələri maraqlandıran sualları cavablandırmışdır.
Görüşdən razılığını ifadə edən doktor A.Öztoprak AMİ-nin rəhbərliyinə, Azərbaycan Tələbələr Birliyinə və tələbələrə təşəkkürünü bildirmişdir.