{nl}

Ümumtəhsil məktəblərinin yuxarı sinif şagirdləri üçün (VII-XI siniflər) vahid məktəbli formasının seçim prosesi başa çatmışdır.
Yanvarın 12-də Bakı Şəhəri üzrə Təhsil İdarəsində (BŞTİ) həmin məktəbli formasının təqdimatı olmuşdur.
Valideyn-Müəllim Assosiasiyası İdarə Heyətinin üzvlərinin, təhsil işçilərinin, valideynlərin, şagirdlərin iştirak etdikləri tədbirdə çıxış edən BŞTİ-nin Beynəlxalq və ictimaiyyətlə əlaqələr sektorunun müdiri Zəminə Əliqızı Bakının ümumtəhsil məktəblərinin şagirdləri üçün vahid məktəbli formasının seçim prosesinin uğurlu olduğunu vurğulamışdır. Xatırlatmışdır ki, I- IV siniflər üçün məktəbli forması bu tədris ilinin sentyabrından müəyyənləşdirilmişdir.
Seçimin nəticəsinə görə, I-VI sinif şagirdlərinin vahid məktəbli forması eyni, VII-XI sinif şagirdlərinin vahid məktəbli forması isə eyni olmaqla I-VI siniflərin məktəbli formasından fərqli olacaqdır. Beləliklə, ümumtəhsil məktəblərində 2011-2012-ci tədris ilindən etibarən bütün sinifləri əhatə etməklə iki formada vahid məktəbli geyimi tətbiq ediləcəkdir.
Valideyn-Müəllim Assosiasiyasının vitse-prezidenti Təranə Şərifova və digər çıxış edənlər ümumtəhsil müəssisələrində məktəbli formasının tətbiqinin əhəmiyyətindən danışmışlar. Qeyd olunmuşdur ki, təhsil ocaqlarında məktəbli formasının tətbiqi tədris prosesinə də müsbət təsir göstərəcəkdir.
Sonra I-VI və VII-XI sinif şagirdlərinin məktəbli formaları nümayiş etdirilmişdir.