Bakı Dövlət Universitetinin (BDU) rektoru, Milli Məclisin deputatı, akademik Abel Məhərrəmovun imzaladığı əmrə əsasən, yanvarın 6-da BDU-nun əyani şöbəsində qış imtahan sessiyası başlamışdır.
Universitetdən bildirmişlər ki, yanvarın 31-də başa çatacaq imtahanlar 3 növbəli olacaq və bütün fakültələr üzrə elektron və alternativ test, o cümlədən monitorinq üsulu ilə həyata keçiriləcəkdir.
İmtahan başlamazdan əvvəl fakültə dekanları, koordinator və rəhbər-koordinatorların iştirakı ilə rektorun görüşü keçirilmişdir.
Görüşdə çıxış edən rektor Abel Məhərrəmov qış imtahan sessiyası haqqında danışmış, dekanları, koordinator və rəhbər koordinatorları prosesə ciddi nəzarət etməyə, tələbələrin biliyini obyektiv qiymətləndirməyə çağırmışdır. Rektor bildirmişdir ki, tələbələrə daha ciddi nəzarət etmək, köçürmə hallarının qarşısını almaq üçün bütün auditoriyalarda kameralar quraşdırılmışdır. Bu işlərə nəzarət edəcək Elektron Tədris Mərkəzi haqqında danışan rektor demişdir ki, qurum BDU-nun 2006-cı ildən etibarən Boloniya prosesinə qoşulması ilə əlaqədar bu prosesin prinsiplərinin həyata keçirilməsinə, universitetdə bakalavriat və magistratura pillələri üzrə tədris prosesinin gedişinə, eyni zamanda, imtahan sessiyasının mütəşəkkil keçirilməsinə nəzarət etmək məqsədilə yaradılmışdır.
İmtahanlara nəzarət edəcək müəllimlərin bölgüsü başa çatdıqdan sonra rektor imtahan keçirilən auditoriyalarda olmuşdur. Fizika fakültəsinin differensial tənliklər, riyazi-fizika üsulları, praktik astrofizika, biologiya fakültəsinin isə torpaq erroziyası, entimologiya, onurğalılar zoologiyası və mərkəzi sinir sistemi fənlərindən imtahan verən II, III və IV kurs tələbələri ilə söhbət etmiş, sualların keçirilmiş mühazirə mətnlərinə uyğun olub-olmaması ilə maraqlanmışdır. Tələbələrə uğurlar arzulayan rektor, onları biliklərinin obyektiv qiymətləndiriləcəyinə əmin etmişdir.{nl}