Dekabrın 28-də Azərbaycan Dillər Universitetində (ADU) ərəb ölkələrinin Azərbaycandakı səfirləri ilə görüş keçirilmişdir.
Görüşdə İraq, İordaniya Haşimilər Krallığı, Misir Ərəb Respublikası, Küveyt, Mərakeş, Qətər, Səudiyyə Ərəbistanı Krallığı və Fələstinin səfirləri iştirak etmişlər.
ADU-nun rektoru, Milli Məclisin beynəlxalq münasibətlər və parlamentlərarası əlaqələr komitəsinin sədri, professor Səməd Seyidov tədbirin məqsəd və əhəmiyyətindən, universitetin həyatında mühüm hadisə olmasından danışmışdır. Rektor rəhbərlik etdiyi ali təhsil müəssisəsinin qazandığı uğurlar, burada son dövrlərdə açılmış fakültə və şöbələr, dil mərkəzləri haqqında qonaqlara məlumat vermişdir. Azərbaycanın hazırda ərəb dilinin öyrənilməsi sahəsində öndə gedən ölkələrdən biri olduğunu vurğulayan S. Seyidov bəzi ali məktəblərimizdə ərəb dilinin tədris olunmasını yüksək qiymətləndirmişdir.
ADU-da bir çox xarici dillərin tədris olunduğunu, tələbələrin bu dilləri mənimsəməklə yanaşı, həmin dilin daşıyıcısı olan xalqların tarixini, mədəniyyətini öyrəndiklərini qeyd edən S.Seyidov yaxın vaxtlarda regionşünaslıq və beynəlxalq münasibətlər fakültəsində ərəbşünaslıq ixtisasının tədris olunacağını, burada təhsil alacaq 10 tələbənin ərəbdilli ölkələrlə daha yaxından tanış olacağını diqqətə çatdırmışdır.
Rektor bildirmişdir ki, şöbənin açılmasında əsas məqsəd yalnız ərəb dilini öyrədilməsi deyil, həm də ərəb mədəniyyətini, adət-ənənələrini, tarixini dərindən bilən mütəxəssislər yetişdirməkdir. Hazırda Prezident İlham Əliyevin apardığı məqsədyönlü siyasət nəticəsində ölkələrimiz arasında uğurlu siyasi və iqtisadi əməkdaşlığın bərqərar olduğunu qeyd edən S.Seyidov bu münasibətlərin təhsil sahəsində də inkişaf etdirilməsinin vacibliyini vurğulamış, ərəb ölkələri səfirlərinin bu işdə universitetə kömək edəcəyinə əminliyini ifadə etmiş, diplomatları əməkdaşlığa dəvət etmişdir.
İordaniya Haşimilər Krallığının ölkəmizdəki səfiri Adel Mohammad Adaileh, İraq səfiri Heydər Şiyə Qubeyşi Əl-Barrak, Misir Ərəb Respublikasının səfiri Sabir Əbdülqədir Mənsur, Mərakeş səfiri Həsən Hami, Səudiyyə Ərəbistanı Krallığının səfiri Fəhd bin Əli əl-Düsəri ərəb ölkələrinin Azərbaycanla bir sıra sahələrdə əməkdaşlıq etdiyini, təhsil sahəsində də qarşılıqlı münasibətlərin qurulmasının vacibliyini vurğulamışlar. ADU-da ərəbşünaslıq ixtisasının tədris olunmasını təhsil və əməkdaşlıq sahəsində böyük nailiyyət kimi dəyərləndirən diplomatlar universitetin təşəbbüsünü müsbət qiymətləndirmiş, bu dilin yüksək səviyyədə öyrədilməsi üçün universitetə hər cür kömək edəcəklərini bildirmişlər.
Milli Məclisin deputatı Fəttah Heydərov qeyd etmişdir ki, ADU-da islam dəyərlərinin məhz ərəb dilində tədrisi tələbələrə bu dinin elmi xüsusiyyətlərini də öyrənməyə və islam əxlaqı ilə daha yaxından tanış olmağa kömək edəcəkdir. O, Azərbaycan xalqının dərin köklərə söykənən tarixi olduğunu və bu xalqın islam mənəviyyatı ilə formalaşdığını bildirmişdir.
Görüşdə bir sıra maraq doğuran məsələlər, o cümlədən ərəb ölkələri ilə Azərbaycan arasındakı əlaqələr, parlamentlərarası dostluq qruplarının fəaliyyəti də müzakirə olunmuşdur.
Sonda qonaqlar universitetin nəzdindəki İnformasiya Resurs Kompleksi, dil mərkəzləri ilə tanış olmuşlar.{nl}