Moskva Fizika-Texniki İnstitutunun (MFTİ) birinci prorektoru, professor Timofey Kondranin və bu institutun ümumi və tətbiqi fizika fakültəsinin dekanı, professor Mixail Trunin Bakı Dövlət Universitetində (BDU) olmuşlar.
Universitetdən bildirmişlər ki, BDU-nun rektoru, Milli Məclisin deputatı, akademik Abel Məhərrəmov ilə keçirilmiş görüşdə T.Kondranin təmsil etdiyi institutun Bakı Dövlət Universiteti ilə əlaqələrinin genişləndirilməsində maraqlı olduğunu bildirmiş, MFTİ-də oxuyan azərbaycanlı tələbələrin sayının artırılmasının vacibliyini söyləmişdir.
Qonaqların fikirləri ilə həmrəy olduğunu vurğulayan akademik Abel Məhərrəmov Moskva Fizika-Texniki İnstitutu ilə səmərəli və işlək əməkdaşlığın mümkünlüyünü vurğulayaraq, bu məsələyə daha çox diqqət ayıracağını bildirmişdir.
Sonra qonaqlar BDU-nun laboratoriyaları və elmi mərkəzləri ilə tanış olmuşlar.
AzərTAc{nl}