Bakı Dövlət Universitetinin (BDU) rektoru, Milli Məclisin deputatı, akademik Abel Məhərrəmovun rəhbərlik etdiyi nümayəndə heyəti Koreya Respublikasında səfərdə olmuşdur.
BDU-dan bildirmişlər ki, Koreya Fondunun dəvəti ilə reallaşan səfər zamanı nümayəndə heyəti Seul və Daejeon şəhərlərindəki dörd aparıcı ali təhsil ocağında olmuşdur.
Seul Milli Texnologiyalar Universiteti, Koreya Elm və Texnologiyalar İnstitutu, Pai Çai və Koreya politexnik universitetlərində olan akademik Abel Məhərrrəmov bir sıra ikitərəfli görüşlər keçirmişdir.
Görüşlərdə ali təhsil ocaqlarının rəhbərləri azərbaycanlı qonaqlara Koreya universitetlərinin fəaliyyəti haqqında məlumat vermiş, təqdimatlarla çıxış etmişlər.
Abel Məhərrəmov son illər ölkəmizin əldə etdiyi sosial-iqtisadi uğurlar, həyata keçirilən irimiqyaslı layihələr və bir çox sahələrdə olduğu kimi, təhsil sahəsində də aparılan islahatlar barədə koreyalı həmkarlarına ətraflı məlumat vermişdir. Azərbaycanın aparıcı ali təhsil ocağı olan Bakı Dövlət Universitetinin fəaliyyətindən danışaran rektor, Prezident İlham Əliyevin tapşırıqlarına əsasən, təhsilimizin beynəlxalq təhsil sisteminə inteqrasiyası məqsədi ilə dünyanın bir sıra aparıcı ali təhsil ocaqlarının təcrübəsindən yararlanmağın vacibliyini qeyd etmişdir.
Görüşlər zamanı Bakı Dövlət Universiteti ilə Koreyanın ali təhsil ocaqları arasında qarşılıqlı əməkdaşlıq və tələbə-müəllim mübadiləsini özündə əks etdirən bir sıra sənədlər imzalanmışdır.
Nümayəndə heyəti səfər çərçivəsində Koreya universitetlərinin nəzdində fəaliyyət göstərən texnoparkların fəaliyyəti ilə yaxından tanış olmuşdur. Bildirilmişdir ki, universitetlərin nəzdində yerləşən texnoparklarda sənaye-texnologiya kompleksləri yaradılmışdır ki, bu da birbaşa təhsil prosesinin və sənayenin inkişafına yönəlmişdir. Texnoparklarda kitabxana, laboratoriya və bir sıra elmi-tədqiqat şöbələri yaradılmışdır. Məqsəd tələbələrin nəzəri biliklərini istehsal prosesinə yönəltməklə onların daha yaxşı mütəxəssis kimi yetişmələrinə nail olmaqdır.
Səfər zamanı akademik Abel Məhərrəmov Koreyada təhsil alan azərbaycanlı tələbələrlə də görüş keçirmişdir. BDU-nun rektoru tələbələrin təhsili və qarşılaşdıqları problemlərlə maraqlanmışdır. Onların dinamik inkişaf edən ölkəmiz üçün yüksək səviyyəli mütəxəssis olmalarının vacibliyini bildirmişdir.
Tələbələr uzaq Koreyada təhsil almalarına baxmayaraq, hər zaman Azərbaycan dövlətinin dəstəyini hiss etdiklərini söyləmişlər.
Altı gün davam edən səfər zamanı Koreya ali təhsil ocaqlarının fəaliyyəti ilə yaxından tanış olan BDU-nun nümayəndə heyəti belə səfərlərin gələcəkdə də davam etdiriləcəyini bildirmişlər.{nl}