Azərbaycan Respublikasının Prezidenti yanında Dövlət İdarəçilik Akademiyasında ümummilli lider Heydər Əliyevin xatirəsinə həsr olunmuş anım mərasimi keçirilmişdir. Tədbirdə akademiyanın professor-müəllim, tələbə və müdavimləri iştirak etmişlər.
Azərbaycan xalqının və dövlətçiliyinin tarixində müstəsna xidmətləri olmuş dahi şəxsiyyət Heydər Əliyevin xatirəsi bir dəqiqəlik sükutla yad edilmişdir. Sonra akademiyanın birinci prorektoru, professor Əlikram Abdullayev ümummilli lider, dünya şöhrətli siyasi xadim Heydər Əliyevin xalqımız qarşısındakı misilsiz xidmətlərindən danışmışdır. O qeyd etmişdir ki, Azərbaycanın müasir tarixində ulu öndər Heydər Əliyevin müstəsna xidmətlərinin ictimai-siyasi mahiyyəti hələ uzun illər tədqiqatçıların diqqət mərkəzində olacaq. Türk dünyasının böyük oğlu, müstəqil Azərbaycan dövlətinin memarı və qurucusu Heydər Əliyevin əziz xatirəsi həyat durduqca ürəklərdə yaşayacaqdır.
Sonra akademiyanın fəlsəfə və sosial psixologiya kafedrasının müdiri, professor Tofiq Rəsulov çıxış edərək Azərbaycan xalqının fenomen şəxsiyyəti Heydər Əliyevlə bağlı xatirələrindən, onun həyat və fəaliyyətinin müasir Azərbaycan gəncliyi üçün örnək olan məqamlarından söhbət açdı.
Tədbirin sonunda dünya şöhrətli siyasi xadim Heydər Əliyevin dövlətçilik fəaliyyətinə həsr olunmuş film nümayiş etdirildi.{nl}

Əliqismət BƏDƏLOV, "Xalq qəzeti"