Dekabrın 9-da Təhsil Nazirliyinin təşkilatçılığı ilə Bakı Dövlət Universitetində (BDU) doktorantların və gənc tədqiqatçıların XV respublika elmi konfransı işə başlamışdır.
Konfransın açılış mərasimində çıxış edən təhsil naziri Misir Mərdanov xalqımızın ümummilli lideri Heydər Əliyevin elm və təhsilimizin inkişafına, dünya təhsil sisteminə inteqrasiya olunmasına daim böyük önəm verdiyini, ulu öndərin ideyalarının Prezident İlham Əliyev tərəfindən uğurla həyata keçirildiyini vurğulamışdır.
M.Mərdanov Təhsil Nazirliyinin və ölkənin ali məktəblərinin davamlı olaraq belə konfranslar keçirdiyini bildirmiş, bu konfranslara marağın ilbəil artdığını qeyd etmişdir.
İki gün davam edəcək konfransda ayrı-ayrı ali təhsil müəssisələrinin doktorant və gənc tədqiqatçılarının 400-dən çox məruzəsi dinləniləcəkdir.
Müasir şəraitdə elmin, təhsilin mühüm rolunu nəzərə çatdıran M.Mərdanov konfrans iştirakçılarına uğurlar arzulamışdır.
BDU-nun rektoru, Milli Məclisin deputatı, akademik Abel Məhərrəmov, ekologiya və təbii sərvətlər nazirinin müavini Novruz Quliyev və digər natiqlər də respublikamızda elmin, təhsilin inkişafından danışmış, konfransın əhəmiyyətini vurğulamışlar.
Sonra konfrans riyaziyyat, fizika, tibb, tarix, iqtisadiyyat və digər bölmələr üzrə işini davam etdirmişdir.{nl}