Azərbaycan Respublikasının Prezidenti yanında Dövlət İdarəçilik Akademiyasında "Yerli özünüidarəetmə və bələdiyyə idarəçiliyinin əsasları" istiqaməti üzrə keçirilən ixtisasartırma kursunun növbəti buraxılışı olmuşdur.
Şəhər və qəsəbə bələdiyyələrinin sədrləri və sədr müavinlərinin iştirak etdiyi kursun əsas məqsədi yerli özünüidarəetmə və bələdiyyə idarəçiliyi sahəsində dinləyicilərin biliklərinin təkmilləşdirilməsi, onlara yeni məlumatların verilməsi, bəzi problemlər ətrafında geniş müzakirə və fikir mübadiləsinin aparılması olmuşdur.
Tədris-tematik plan üzrə kursda ulu öndər Heydər Əliyevin dövlət idarəçilik təcrübəsi, yerli özünüidarəetmə sahəsində dövlət siyasətinin başlıca istiqamətləri, bu sahədə beynəlxalq təcrübənin öyrənilməsi, yerli özünüidarəetmənin başlıca inkişaf meylləri, bələdiyyələrdə torpaq münasibətləri və s. mövzular üzrə mühazirə və dəyirmi masa keçirilmişdir.
Təhsil müddəti ərzində kursda Milli Məclisin regional məsələlər komitəsinin sədri Arif Rəhimzadə və komitənin üzvü Tahir Rzayev, Ədliyyə Nazirliyinin Bələdiyyələrlə İş Mərkəzinin rəisi Mehdi Səlimzadə, Vergilər Nazirliyinin şöbə rəisi Yunis Quliyev, Mədəniyyət və Turizm Nazirliyinin şöbə rəisi Fikrət Babayev, MSK-nın üzvü Tofiq Həsənov, Əmlak Məsələləri üzrə Dövlət Komitəsinin böyük məsləhətçisi Talıb Mirzəyev və digər mütəxəssislər, eləcə də tanınmış alimlər dinləyicilər qarşısında yerli özünüidarəetmənin müxtəlif problemlərinə dair mühazirələrlə çıxış etmişlər.
Azərbaycan Respublikasının Prezidenti yanında Dövlət İdarəçilik Akademiyasında həmin istiqamət üzrə dinləyicilərin buraxılış mərasimində DİA-nın rektoru, əməkdar elm xadimi, professor Seyfəddin Qəndilov çıxış edərək, onlara vəsiqələr təqdim etmiş və gələcək işlərində uğurlar arzulamışdır.

S. MƏMMƏDBƏYOVA, DİA-nın mətbuat və informasiya xidmətinin rəhbəri