Ukraynanın İrpen şəhərinin Zərifə Əliyeva küçəsində yerləşən 12 nömrəli dilçilik məktəbinin bir qrup müəllimi Kəngərli rayonunda akademik Zərifə Əliyeva adına Şahtaxtı kənd orta məktəbində olmuşdur.
Qonaqlar əvvəlcə akademik Zərifə Əliyevanın foyedəki büstü önünə tər gül dəstələri düzmüş, məktəbdə fəaliyyət göstərən Zərifə Əliyeva muzeyi ilə tanış olmuş, muzeyin xatirə kitabına ürək sözlərini yazmışlar.
Məktəbin müəllimi Arifə Məmmədova qonaqlara akademikin Azərbaycanda oftalmologiya elminin inkişafında, göz xəstəliklərinin müayinə və müalicəsində fəaliyyətindən, ixtisaslı tibbi kadrlar yetişdirilməsində böyük xidmətlərindən danışmış, onun əsl Azərbaycan qadınına xas olan keyfiyyətlərindən söz açmış, Zərifə Əliyevanın muzeydə mühafizə və nümayiş olunan fotoşəkilləri, kitabları barədə ətraflı məlumat vermişdir.
Dilçilik məktəbinin direktoru Valentina Antoninko çıxışında bildirmişdir ki, bu səfərin məqsədi hər iki təhsil ocağı arasında dostluq münasibətləri yaratmaqdır.
Qonaqlar məktəblə tanış olmuş, gətirdikləri hədiyyələri muzeyə təqdim etmişlər. Onlara akademik Zərifə Əliyevanın nəfis şəkildə nəşr olunmuş kitabları, "Naxçıvan ensiklopediyası", "Naxçıvan abidələri ensiklopediyası", "Naxçıvan xanlığı", "Naxçıvan tarixi atlası", "Naxçıvan folkloru", muxtar respublikanın tarixi abidələrinin maketləri və digər hədiyyələr verilmişdir.
V.Antoninko qonaqpərvərliyə görə təşəkkür etmiş, səmərəli əməkdaşlıq quracaqlarına əminliyini bildirmişdir.