Dekabrın 7-də Yaponiyanın Azərbaycandakı səfiri Şusuke Vatanabe Bakı Dövlət Universitetində (BDU) olmuşdur.
Universitetin mətbuat və informasiya şöbəsindən AzərTAc-a bildirmişlər ki, burada keçirilmiş görüşdə BDU-nun rektoru, Milli Məclisin deputatı, akademik Abel Məhərrəmov rəhbərlik etdiyi ali təhsil ocağı barədə səfirə ətraflı məlumat vermişdir. BDU-nun Yaponiya universitetləri ilə əməkdaşlığı məsələsinə toxunan rektor bu ölkənin ali təhsil ocaqları, xüsusilə Qumma Universiteti ilə əlaqələrin mövcud olduğunu diqqətə çatdırmışdır.
Abel Məhərrəmov 2000-ci ildən BDU-nun şərqşünaslıq fakültəsində yapon dili və ədəbiyyatı ixtisasının fəaliyyət göstərdiyini söyləmişdir. Bildirmişdir ki, hazırda bu dil üzrə 37 bakalavr və 2 magistr təhsil alır. Ümumilikdə isə indiyədək universitetdə bu ixtisas üzrə 61 bakalavr və 9 magistr hazırlanmışdır. Akademik Abel Məhərrəmov tələbələrə dərsləri fakültənin yetirmələri olan məzunların keçdiyini, BDU-da yapon dili üzrə yeni elmi məktəbin formalaşdığını səfirin diqqətinə çatdırmışdır.
Səfirlə görüşün münasibətlərə yeni impuls verəcəyini vurğulayan rektor universitetlərarası əməkdaşlığın genişləndirilməsində maraqlı olduğunu bildirmişdir. Qeyd etmişdir ki, təkcə yapon dili və ədəbiyyatı üzrə mütəxəssis hazırlamaqla iş bitmir. Eyni zamanda, mikrobiologiya, biokimya, informatika, riyaziyyat sahələrində də əməkdaşlıq etmək lazımdır.
Rektorun fikirləri ilə həmrəy olduğunu deyən səfir Şusuke Vatanabe Yaponiyada azərbaycanlı tələbələrin sayının artırılmasında, universitetlərarası əlaqələrin daha da genişləndirilməsində maraqlı olduğunu söyləmişdir.
Sonda səfir şərqşünaslıq fakültəsinin yapon dili üzrə təhsil alan bir qrup tələbəsi ilə söhbət etmiş, onların dili mənimsəmə səviyyəsindən və hazırlıqlarından məmnun qaldığını bildirmişdir.{nl}