Dekabrın 5-də tanınmış bioloq alim, Dövlət Mükafatı laureatı, Azərbaycan Milli Elmlər Akademiyasının həqiqi üzvü, baytarlıq elmləri doktoru, professor, əməkdar elm xadimi Musa Musayev ilə vida mərasimi keçirilmişdir.
Mərhumla vida mərasimi Azərbaycan Milli Elmlər Akademiyasının Botanika İnstitutunun matəmsayağı bəzədilmiş böyük akt zalında təşkil edilmişdir.
Vida mərasimində dövlət rəsmiləri, elm və ictimaiyyətin nümayəndələri iştirak etmişlər.
Alimin tabutu önünə Azərbaycan Respublikasının Prezidenti adından əklil qoyulmuşdur. Cənazənin ətrafına hökumət təşkilatları və müxtəlif kollektivlər adından da əklillər düzülmüşdü.
Musa Musayev uzun illər ölkəmizdə biologiya elminin müxtəlif istiqamətlərinin inkişaf etdirilməsi sahəsində mühüm xidmətlər göstərmişdir. O, 350-dən artıq elmi əsərin, o cümlədən 14 monoqrafiya, dərslik və metodik vəsaitin müəllifidir. Musa Musayev səmərəli elmi yaradıcılıqla yanaşı, pedaqoji fəaliyyətlə də məşğul olmuş və yüksək ixtisaslı kadrların hazırlanması işində bilik və bacarığını əsirgəməmişdir. Alimin rəhbərliyi altında 50-yə yaxın elmlər namizədi və elmlər doktoru yetişdirilmişdir. O, beynəlxalq miqyaslı konqres və simpoziumlarda Azərbaycan elmini layiqincə təmsil etmişdir.
Musa Musayevin zəngin elmi fəaliyyəti yüksək qiymətləndirilmişdir. O, Azərbaycanda biologiya elminin inkişafındakı xidmətlərinə görə bir çox orden və medallarla, eləcə də müstəqil Azərbaycan Respublikasının ali mükafatı olan "Şöhrət" ordeni ilə təltif edilmişdir.
Tanınmış bioloq alim, bacarıqlı elm təşkilatçısı və səmimi insan Musa Əbdürrəhman oğlu Musayevin xatirəsi onu tanıyanların qəlbində həmişə yaşayacaqdır.
Mərhum 2-ci Fəxri Xiyabanda torpağa tapşırılmışdır.
Allah rəhmət eləsin!{nl}

AzərTAc