Dekabrın 3-də Misir Ərəb Respublikasının (MƏR) Azərbaycandakı səfiri Sabir Əbdülqədir Mənsur Bakı Dövlət Universitetində (BDU) olmuşdur.
BDU-nun mətbuat və informasiya şöbəsindən bildirmişlər ki, universitetin rektoru, akademik Abel Məhərrəmov ilə görüşdə tərəflər ölkələrimiz arasında təhsil sahəsində əməkdaşlığın vəziyyətini, o cümlədən ikili diplom məsələsini müzakirə etmişlər.
Rektor Abel Məhərrəmov qonağa BDU haqqında ətraflı məlumat vermişdir.
Azərbaycanın ən nüfuzlu və qədim universiteti ilə əməkdaşlıqdan məmnun olduğunu bildirən səfir Sabir Əbdülqədir Mənsur 1994-cü ildə ümummilli lider Heydər Əliyevin, 2007-ci ildə isə Prezident İlham Əliyevin Misirə səfərlərini xatırlatmışdır. Prezident Hüsni Mübarəkin Azərbaycana verdiyi önəmi xüsusilə qeyd edən səfir bildirmişdir ki, bu münasibətlər xalqlarımız arasında dostluq və qardaşlığın bariz nümunəsidir.
Ölkələrimiz arasında siyasi, iqtisadi, mədəni münasibətlərə toxunan diplomat BDU ilə Misirin ali məktəblərinin əlaqələrinin daha da genişləndirilməsində, universitetdə təhsil alan misirli magistr və aspirantların sayının artırılmasında maraqlı olduqlarını bildirmişdir.
Abel Məhərrəmov Misirin Qahirə, Ayn-Şəms və Suhac universitetləri ilə əməkdaşlıq müqaviləsinin mövcud olduğunu xatırlatmış, həmin sənədləri yeniləmək, daha səmərəli və işlək etməyin vacibliyini vurğulamışdır. Riyaziyyat, kimya və ərəb dili üzrə ikili diplomların verilməsini təklif edən akademik Abel Məhərrəmov misirli tələbələrin təkcə magistr və aspirantura pilləsində deyil, həm də bakalavr pilləsinin ingilis dili qruplarında oxumalarının, bu amilin onların gələcək fəaliyyətlərində əhəmiyyətli olacağının vacibliyini diqqətə çatdırmışdır.
Rektorun fikirləri ilə həmrəyliyini vurğulayan səfir BDU ilə tələbə mübadiləsinə, ikili diplomların verilməsinə hazır olduqlarını bildirmişdir.
Sonda qərara alınmışdır ki, razılaşdırılmış məqamları əks etdirən sənəd hazırlansın və tərəflərə təqdim edilsin.{nl}

AzərTAc