Noyabrın 24-də Bakı Dövlət Universitetində (BDU) Tələbə Gənclər Təşkilatının üçüncü hesabat-seçki konfransı keçirilmişdir.
Tədbir iştirakçıları əvvəlcə Fəxri Xiyabana gələrək xalqımızın ümummilli lideri, görkəmli dövlət xadimi Heydər Əliyevin xatirəsini ehtiramla yad etmiş, məzarı önünə əklil qoymuşlar.
Görkəmli oftalmoloq alim, akademik Zərifə xanım Əliyevanın da xatirəsi yad edilmiş, məzarı üzərinə tər güllər düzülmüşdür.
Sonra tədbir öz işinə başlamışdır.
BDU-nun rektoru, akademik Abel Məhərrəmov qloballaşan dünyada tələbə gənclərin fəallığına böyük ehtiyac duyulduğunu qeyd etmiş, tələbələrin idarəçilik sistemində iştirakı ilə yanaşı, onların beynəlxalq proqramlara, treninqlərə də qoşulmalarının zəruriliyini bildirmişdir. Rektor vurğulamışdır ki, universitetdə bu istiqamətdə bir sıra yeniliklər həyata keçirilir. Tələbələrin beynəlxalq aləmə daha yaxından nüfuz edə bilmələri üçün gələn ildən universitetin məzunları ingilis dilindən də dövlət imtahanı verəcəklər.
Təhsil nazirinin müavini Elmar Qasımov, gənclər və idman nazirinin müavini İntiqam Babayev təhsildə aparılan islahatlardan, dünyaya inteqrasiya prosesində tələbələrin daha fəal olmalarının zəruriliyindən danışmışlar. Qeyd etmişlər ki, Azərbaycanın ali təhsil sistemində özünəməxsus yer tutan Bakı Dövlət Universitetinin tələbələri ölkənin ictimai-siyasi həyatında, eləcə də dünyaya inteqrasiya prosesində fəal rol oynayırlar. Bununla yanaşı, əlbəttə, milli- mənəvi dəyərlərimizi də qorumalıyıq. Hazırda dövlətimiz tələbə gənclərin fəallığının artırılması, eləcə də onların cəmiyyətin ictimai-siyasi həyatında fəal iştirakının təmin olunması istiqamətində bir sıra mühüm tədbirlər həyata keçirir.
Tələbə Gənclər Təşkilatı sədrinin əvəzi Lamiyə Hüseynova hesabat məruzəsi ilə çıxış etmişdir. Müzakirələrdən sonra yeni heyət seçilmişdir.{nl}