Amerika Birləşmiş Ştatlarının Edinboro Universitetinin prezidenti doktor Ceremi Braun noyabrın 22-də Bakı Dövlət Universitetində (BDU) olmuşdur.
BDU-nun rektoru akademik Abel Məhərrəmov universitetin yaranma tarixindən, inkişaf mərhələlərindən, beynəlxalq əlaqələrindən danışmış, Pensilvaniya Ştatının Edinboro Universiteti ilə münasibətlərin yaranmasında maraqlı olduğunu bildirmişdir.
ABŞ-ın müxtəlif universitetlərində işləmiş, 2007-ci ildən isə Edinboro Universitetinin prezidenti vəzifəsində çalışan doktor Ceremi Braun təmsil etdiyi universitetin ABŞ-ın aparıcı ali məktəbləri sırasında yer aldığını qeyd etmiş, BDU ilə əməkdaşlıqda maraqlı olduğunu vurğurlamışdır.
Sonra universitetlərarası əməkdaşlıq barədə Anlaşma Memorandumu imzalanmışdır. Sənəddə tədqiqatçı, aspirant və magistrantların mübadiləsi, birgə layihələr çərçivəsində elmi araşdırmaların aparılması, alimlərin və müəllimlərin təcrübə mübadiləsi, birgə seminar və konfransların təşkili, qarşılıqlı maraq doğuran layihə və proqramlarda iştirak nəzərdə tutulmuşdur.
İmzalanma mərasimindən sonra qonaqlar BDU-nun laboratoriya və elmi mərkəzlərində olmuşlar.{nl}