Azərbaycan Diplomatik Akademiyası "Fəlsəfə doktorlarının inkişafına dəstək Proqramı"na başlamışdır.
Akademiyadan bildirmişlər ki, proqramın əsas məqsədi xaricdə fəlsəfə doktoru elmi dərəcəsi almış və doktorantura təhsili alan azərbaycanlı mütəxəssisləri Azərbaycana cəlb etmək və eyni zamanda, onların peşəkar inkişafına və karyera irəliləyişlərinə yardım göstərməkdir.
Proqram tədqiqat təqaüdləri və seminarlar vasitəsilə həyata keçirilir.
Növbə ilə Vaşinqton və London şəhərlərində keçiriləcək seminarlarda azərbaycanlı və regionumuza marağı olan əcnəbi fəlsəfə doktorları bir araya gələcəklər.
İyunun 4-5-də Vaşinqtonda keçiriləcək seminarda əsasən Şimali Amerika ölkələrində təhsil almış azərbaycanlı fəlsəfə doktorları iştirak edəcəklər.
Proqramla bağlı yekun konfrans isə dekabrın 20-21-də Bakıda təşkil olunacaqdır.
Proqramın əhəmiyyətini vurğulayan xarici işlər nazirinin müavini, ADA-nın rektoru Hafiz Paşayev bildirmişdir ki, layihə bu günün aktual problemi olan "beyin axını"nın qarşısının alınmasına və xaricdə müxtəlif sahələr üzrə təhsil almış azərbaycanlı fəlsəfə doktorlarının vətənlərinə qayıtmasına zəmin yaradacaqdır. Eyni zamanda, bu proqram təhsilini xaricdə alan azərbaycanlılar arasında əlaqəni gücləndirən bir şəbəkə yaradacaq, beynəlxalq akademik mühitdə Azərbaycan haqqında məlumatı artıracaq və ADA-nı akademik debatların keçirildiyi platformaya çevirəcəkdir.
Proqram haqqında əlavə məlumatı http://ada.edu.az/facultyresearch/phdsupport/ linkindən əldə etmək olar.
AzərTAc