Aprelin 19-da Yeni Azərbaycan Partiyası (YAP) Nəsimi rayon təşkilatında rayon ərazisindəki ali məktəblərdə təhsil alan 20-dək ölkənin tələbə gənclərinin iştirakı ilə "Təhlükəsiz gələcək naminə" mövzusunda tədbir keçirilmişdir.
24 aprel - Dünya Gənclərinin Beynəlxalq Həmrəylik Gününə həsr olunmuş tədbir YAP Nəsimi rayon təşkilatının Gənclər Birliyi və Bakı Beynəlxalq Tələbə Klubunun təşəbbüsü ilə təşkil edilmişdir.
Tədbirin əsas məqsədi dünya ictimaiyyəti arasında çaşqınlıq yaradan erməni riyakarlığını ölkəmizdə təhsil alan xarici ölkə gənclərinin vasitəsilə beynəlxalq təşkilatlara və dünya gənclərinə çatdırmaqdan ibarət olmuşdur.
YAP Nəsimi rayon təşkilatının sədri, Milli Məclisin deputatı Məlahət İbrahimqızı tədbirin əhəmiyyətini yüksək qiymətləndirərək terrorun, zorakılığın yayıldığı dünyada gənclərin bəşəri dəyərlərin təbliği naminə birləşməsinin vacibliyini vurğulamışdır. Azərbaycanda təhsil alan tələbələrin gələcəkdə öz dövlətlərində tanınmış ictimai-siyasi xadim olacaqlarına şübhə etmədiyini söyləyən deputat onları ölkələrinə qayıtdıqdan sonra Azərbaycan həqiqətlərinin təbliğində fəal olmağa çağırmışdır.
Tədbirin sonunda beynəlxalq təşkilatlara və dünya gənclərinə müraciət qəbul olunmuşdur.
Müraciətdə deyilir ki, bu gün bəşəriyyət müxtəlif qlobal təhlükələrlə üz-üzə qalmışdır. Gündən-günə dünyanı sarsıdan iqlim dəyişiklikləri, terrorizm, narkomaniya, silah və insan alveri kimi qlobal problemlər öz coğrafiyasını genişləndirir.
Vurğulanmışdır ki, beynəlxalq ictimaiyyəti təhlükə altında saxlayan terrorizm, Azərbaycan, Fransa, Türkiyə, Rusiya və başqa ölkələrdə törədilən terror aktları dünya dövlətlərini daha dərindən düşünməyə sövq etməlidir. Hazırda dünyamızda olan qlobal təhlükələr və etnik silahlı qarşıdurmalar azmış kimi, tarixin qaranlıq səhifələrindən əsassız olaraq qaynaqlanan problemlər də vardır. "Erməni soyqırımı" adlanan uydurma və əsassız iddialar da bu qəbildəndir.{nl}

AzərTAc