Noyabrın 10-da Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) Rusiyanın "İnformnauka" MMC şirkəti ilə birgə elmi və elmi-texniki jurnalların sərgisi açılmışdır.
Tədbirdə giriş sözü ilə çıxış edən MEK-nın direktoru Aybəniz Əliyeva-Kəngərli sərginin məqsəd və əhəmiyyətindən danışmışdır.
AMEA-nın prezidenti, akademik Mahmud Kərimov hazırda elm siyasətinin dövlətimizin başlıca vəzifələrindən biri olmasından, Prezident İlham Əliyevin Azərbaycan elmində islahatların aparılması ilə bağlı imzaladığı sərəncamlardan, Rusiya ilə mədəni əlaqələrdən, bu əlaqələrin genişləndirilməsinin vacibliyindən danışmışdır.
Bakı Dövlət Universitetinin professoru Abuzər Xələfov ölkəmizdə elmin inkişafına göstərilən dövlət qayğısından, Azərbaycan elminin beynəlxalq elm məkanına inteqrasiyasının təmin olunması sahəsində görülən işlərdən, beynəlxalq elmi əməkdaşlığın genişləndirilməsinin vacibliyindən bəhs etmişdir.
"İnformnauka" MMC-nin baş direktoru Leonid Alfimov rəhbərlik etdiyi qurumun fəaliyyətindən, beynəlxalq sərgilərdə qazandığı uğurlardan, Rusiyanın MDB dövlətlərinə elmi və elmi-texniki ədəbiyyat ixrac edən ən iri müəssisələrindən biri olmasından söhbət açmışdır. L.Alfimov Rusiyada nəşr olunan jurnalların azərbaycanlı alim və mütəxəssislərin, tədqiqatçıların qiymətli elmi informasiya ilə təmin edilməsində əhəmiyyətli rol oynayacağına, həmçinin MEK-nın dövri mətbuat fondunu zənginləşdirəcəyinə əminliyini bildirmişdir.
Bildirilmişdir ki, firma tərəfindən MEK-ya 200-dən çox adda elmi jurnal təqdim olunmuşdur. "Rusiya Elmlər Akademiyasının xəbərləri", "Rusiya Elmlər Akademiyasının məruzələri", "Cəbr və analiz", "Neft kimyası" "Atom energetikası", "Nüvə fizikası", "Ekologiya" və digər jurnallar öz elmi tutumu, zəngin tətbiqi materiallara malik olması ilə diqqəti daha çox cəlb edir.
Beynəlxalq əlaqələrin genişləndirilməsi, dərinləşdirilməsi və inkişafı istiqamətində keçirilən tədbirlərin davamı olan sərgidə nümayiş etdirilən jurnallar Mərkəzi Elmi Kitabxananın dövri mətbuat zalında oxucuların ixtiyarına verilmişdir.
Sonda tədbir iştirakçıları sərgi ilə tanış olmuşlar.{nl}