Azərbaycan Respublikasının Prezidenti cənab İlham Əliyev 2010-cu ili ölkəmizdə "Ekologiya ili" elan edib.
Bununla əlaqədar məktəblilərin ekoloji biliyini artırmaq, ekologiya ilə bağlı məsələlərin dərindən öyrənməyə marağı olan şagirdləri müəyyən etmək və ölkəmizə ekoloji maarifləndirmənin gücləndirilməsini təmin etmək məqsədilə Bakı Şəhəri üzrə Təhsil İdarəsi və Azərbaycan Təhsil İşçiləri Azad Həmkarlar İttifaqı Respublika Komitəsi paytaxtın ümumtəhsil məktəblərinin 5-11-ci sinif şagirdlərinin iştirakı ilə "Ətraf mühit və biz" mövzusunda olimpiada keçirir. Üç mərhələdən (məktəb, rayon, şəhər) ibarət olimpiada 7 nominasiya üzrədir.
Bakının Nəsimi rayonunun bütün ümumtəhsil məktəbləri şagirdlərinin fəal iştirak etdiyi olimpiadanın 2-ci (rayon) mərhələsinə yekun vurulub.
Təşkilat komitəsinə təqdim edilmiş 71 iş metodist-müəllimlər və mütəxəssislərdən ibarət münsiflər heyəti tərəfindən baxılaraq qaliblər müəyyənləşdirilib. Seçilmiş işlər arasında 23 nömrəli məktəbin şagirdləri Turan Məmmədzadə və Elşən Quliyevin "Ətraf mühitin təmizlənməsi" layizəsi, 19 nömrəli məktəbdən Naidə Mustafayevanın "Xəzərin ekoloji problemləri" referatı, 164 nömrəli məktəbin şagirdi Mahmud Mirzəyevin "Ətraf mühit və biz" foto albomu, 159 nömrəli məktəbin şagirdi Tərlan Məmmədovun "Şəhərimizin ekoloji video görüntüləri" materialı vardır. 54 nömrəli məktəbdə rayon mərhələsinin yekunu ilə bağlı yığıncaq keçirilib. Tədbirdə Nəsimi Rayon İcra Hakimiyyəti və Bakı şəhəri üzrə Təhsil İdarəsinin məsul işçiləri iştirak etmişlər.
Bütün nominasiyalar üzrə birinci yer tutmuş 7 işin şəhər mərhələsində iştiraka təqdim edilməsi qərara alınmışdır. Qaliblər ATİAHİ Nəsimi Rayon Komitəsi tərəfindən fəxri fərman, diplom və qiymətli hədiyyələrlə mükafatlandırılmışdır.

Ayaz HƏMİDOĞLU, "Xalq qəzeti"