Noyabrın 6-da Pakistanın Milli Menecment Kollecində təhsil alan yüksək və orta rütbəli məmurlar Azərbaycan Diplomatik Akademiyasında (ADA) olmuşlar.
ADA-dan bildirmişlər ki, pakistanlı qonaqlar təhsil ocağının fəaliyyəti və gələcək planları ilə tanış olmuşlar.
Akademiyanın professor heyəti ADA-da tədris, aparılan elmi araşdırmalar və onların əhəmiyyəti haqqında danışmışdır. Qonaqlara Ermənistanın Azərbaycana təcavüzü, torpaqlarımızın 20 faizinin işğal altında olması barədə ətraflı məlumat verilmiş, bunun ölkəmizin xarici siyasətinə təsirindən bəhs edilmişdir.
Pakistanın Milli Menecment Kollecinin dekanı Rahat ul Ain ölkəmizlə bağlı təəssüratlarından, Azərbaycan iqtisadiyyatının sürətli inkişafından danışmışdır. Azərbaycan hökumətinin reallaşdırdığı təhsil təşəbbüslərinin əhəmiyyətini qeyd edən Rahat ul Ain vurğulamışdır ki, bu siyasət gələcəkdə də mövcud inkişafın davamına zəmin yaradacaqdır.
Həm azərbaycanlı professorlar, həm də pakistanlı qonaqlar ölkələrimiz arasında dostluq münasibətlərindən danışmış, bunun beynəlxalq qurumlarda faydalı əməkdaşlığa səbəb olduğunu vurğulamışlar.
Görüşdə bildirilmişdir ki, ADA pakistanlı tələbələrin burada təhsil alması üçün təqaüd verməyə hazırdır.
AzərTAc{nl}