Dövlət İdarəçilik Akademiyasında fəaliyyət göstərən tələbə klublarının təqdimat mərasimi keçirilmişdir. Tədbirdə məqsəd DİA-ya yeni qəbul olunmuş birinci kurs tələbələrinin akademiyanın elmi və ictimai həyatına daha tez inteqrasiya olunmasını təmin etmək idi. Əvvəlki görüşlərdə tələbələrimiz DİA-nın professor-müəllim heyəti və kafedralarla tanış olmuşdur. Bu görüşdə isə I kurs tələbələri akademiyada fəaliyyət göstərən müxtəlif tələbə klubları ilə daha yaxından tanış oldular.
Tədbiri giriş sözü ilə tədris işləri üzrə I prorektor professor Əlikram Abdullayev açaraq tələbələri səmimi-qəlbdən təbrik edərək, təməli ümummilli liderimiz Heydər Əliyev tərəfindən qoyulmuş bu təhsil ocağının daim inkişaf etdiyini diqqətə çatdırdı. O, möhtərəm Prezident İlham Əliyevin gənclərimizə göstərdiyi qayğı və diqqətə təhsildə yüksək göstəricilərə nail olmaqla cavab verməyi, daim öz üzərlərində işləməyi, biliklərə əzmlə yiyələnməyi, akademiyanın elmi və ictimai həyatında yaxından iştirak etməyi tövsiyə etdi.
Sonra Səbail Rayon İcra Hakimiyyəti Gənclər və İdman İdarəsinin rəisi Vüqar Mürsəlov, İctimai Televiziyanın əməkdaşı Cəsarət Valehov birinci kurs tələbələrinə uğurlar arzuladı. DİA Həmkarlar Komitəsinin sədri Yusif Ağayev çıxış edərək akademiyada fəaliyyət göstərən gənclər təşkilatları və tələbə klubları barəsində məlumat verdi, Azərbaycanda təhsil müəssisələrinin və tələbələrin potensialının ildən-ilə artması barədə danışdı. DİA Tələbə Gənclər Təşkilatının sədri Taleh Quliyev, Debat Klubunun rəhbəri Kənan Məmmədov , SİFE (Tələbələr Azad Sahibkarlıq Fəaliyyətində) klubunun rəhbərləri Sənan Əhmədov və Heydər Quliyev, İdman klubunun rəhbəri Rəşad Sadiqov, "Kim, nə vaxt, nə zaman?" intellektual oyunlar klubunun rəhbəri Tural Hüseynzadə, Diplomatiya və araşdırmalar klubunun rəhbəri Nigar Əliyeva, Disskussiya klubunun rəhbəri Tamerlan Dəmirbəyli və digərləri çıxış edərək qazandıqları uğurlar haqqında danışdılar və hazırladıqları slaydşoları təqdim etdilər.
Sonda foyedə tələbə klublarının əldə etdikləri nailiyyətlər nümayiş etdirildi. Sərgi iştirakçıların böyük marağına səbəb oldu.

Ə.BƏDƏLOV, "Xalq qəzeti"