Lənkəran Dövlət Universitetində ali təhsil ocağının rəhbərliyi ilə birinci kurs tələbələrinin görüşü keçirilmişdir.
Universitetin rektoru, fizika-riyaziyyat elmləri doktoru, professor, əməkdar elm xadimi Asəf İskəndərov ali məktəbə qəbul olunanları təbrik etmiş, kredit sisteminə keçidlə əlaqədar yeni təhsil texnologiyalarının vacibliyindən, bu istiqamətdə müəllim və tələbələr qarşısında duran vəzifələrdən danışmışdır. O, bildirmişdir ki, universitetdə elmin və təhsilin yeni səviyyədə inkişafı istiqamətində səylər ildən-ilə artır.
Görüşdə qeyd edilmişdir ki, yeni dərs ilində universitetdə 1500-dək tələbə təhsil alır. Bunun 382 nəfəri tələbə adına bu il layiq görülmüşdür. Qəbul olunan tələbələrin 348 nəfəri bakalavr, 34 nəfəri magistr pilləsində oxuyur.
Elmlər namizədləri- xarici dil kafedrasının müdiri Kamran Kazımov, iqtisadiyyat və idarəetmə fakültəsinin dekanı Əlixan Bədəlov, təbiət fakültəsinin dekanı Rəşad Əliyev, humanitar və pedaqoji elmlər fakültəsinin dekanı Rakif İbadov tələbələrə ən xoş arzularını bildirmiş, elm və təhsil yolunda onlara uğurlar arzulamışlar. Birinci kurs tələbələrindən Cəmilə Əliyeva, Aynur Fərzəlizadə, Günəş Bayramlı, Rüfanə Diyarova, Aygün Babayeva, Kəmalə Mövsümzadə, Elçin Bağırzadə, Firuzə Bəylərova, Rüfət Zülfüqarlı və Sevər Ağayeva ürək sözlərini söyləmiş, yaxşı oxuyacaqlarını, universitetin ictimai həyatında fəal iştirak edəcəklərini bildirmişlər. Sonda birinci kursda oxuyanlara tələbə biletləri təqdim edilmişdir.

Ə. ƏLİYEV, "Xalq qəzeti"nin bölgə müxbiri