Azərbaycan Universiteti təhsilin keyfiyyətinin və tələbə-pedaqoji heyətin fəaliyyət səmərəliliyini artırmaq üçün cari tədris ilinə yeni binada başlamışdır. Bolonya prosesinin tələblərini daha mükəmməl icra etməyə səy göstərən universitet kollektivi təhsildə yeni standartların tətbiqi, keyfiyyətin təmin olunmasında universitetdaxili prosedur və qaydaların daha dolğun icra olunması, tədris proqramlarının və sillabusların təkmilləşməsi, heyətin interaktiv təlim metodlarına daha mükəmməl yiyələnməsi istiqamətlərində səylərini artırmaqdadır.
Bu ali təhsil ocağında yaradılmış şəraitlə tanış olmaq məqsədilə təhsil naziri Misir Mərdanov dünən Azərbaycan Universitetində olmuşdur.Nazir bu hadisə ilə bağlı tələbələri və pedoqoji kollektivi təbrik etmiş, ölkə Prezidenti İlham Əliyevin təhsilin inkişafına göstərdiyi diqqət və qayğıdan ətraflı söhbət acmışdır. Rektor Akif Musayev bu ali təhsil ocağının son illər əldə etdiyi uğurlar barədə nazirə ətraflı məlumat vermişdir. O demişdir: - Müəllim və tələbələrin ixtiyarına verilən bu binada sürətli kabel internet şəbəkəsi və "W-Fi" sistemi mövcuddur. Bütün auditoriyalar və inzibati kabinetlər kompyuterlə təmin olunub. Auditoriyalarda müasir proyektorlar quraşdırılıb. Universitetdə yüksək tədris imkanına sahib "ağıllı lövhə"lərdən istifadə olunur.
Jurnalistika ixtisası üzrə təhsil alan tələbələrin ixtiyarına verilmiş Studiya-Media Mərkəzində jurnalistin ən müasir tələblər səviyyəsində fəaliyyət göstərməsi üçün hər cür şərait yaradılıb. Bu mərkəzdən, habelə konfrans zallarından istənilən televiziya kanalı, habelə dünyanın hər hansı universiteti ilə canlı yayım reallaşdırıla, telekörpü qurula və ya distant təhsil təşkil edilə bilər.
İnformatika və dil dərslərinin keçirilməsi üçün universitetdə 6 kompyuterləşdirilmiş auditoriya var. İnternet zalında eyni vaxtda 23 tələbə tədris tapşırıqlarını hazırlaya və internetdən materiallar toplaya bilər.
Azərbaycan Universitetinin zəngin kitabxanasında 40 min nüsxədən çox müxtəlif növ ədəbiyyat saxlanılır. Universitetin tələbə və müəllimləri Yaxın Doğu Universitetinin elektron kitabxanasına çıxış olaraq 150 milyon qaynaqdan ödənişsiz istifadə imkanı əldə etmişlər. Universitet dərsliklər, dərs vəsaitləri, kitablar, tədris proqramları və tələbələr üçün zəruri materiallar, araşdırma işləri çap edən ən müasir mətbəəyə malikdir.
Xatırladaq ki, universitet iqtisadiyyat və humanitar fakültələr üzrə Azərbaycan dili və ədəbiyyatı, ingilis dili, riyaziyyat və informatika, tarix müəllimliyi, jurnalistika, ingilis dili tərcüməsi, dünya iqtisadiyyatı, mühasibat uçotu və audit, maliyyə, menecment, marketinq, dövlət və bələdiyyə idarəçiliyi, habelə sosial iş ixtisasları üzrə bakalavr və 12 ixtisas üzrə magistr dərəcəsi, bununla yanaşı, ABŞ-ın Corciya Dövlət Universiteti, Gürcüstanın Qafqaz Universiteti ilə birgə əməkdaşlıq çərçivəsində biznes inzibatçılığı sahələrində bakalavr və magistr üzrə kadrlar hazırlayır. Universitetdə aspirantura, dissertantura və doktorantura fəaliyyət göstərir.
Universitet 6 beynəlxalq təşkilatın üzvüdür və dünyanın 19-dan çox nüfuzlu universiteti ilə əməkdaşlıq edir.
Azərbaycanda və dünyada baş verən sürətli dəyişmələrin önündə getməyə qabil kadrların hazırlanması, beynəlxalq təhsil məkanına inteqrasiya, təkcə ölkədə deyil, regionda, habelə dünyada rəqabət qabiliyyətli ali təhsil müəssisəsinə çevrilməsi Azərbaycan Universitetinin inkişaf strategiyasının əsas məqsədidir.

Vaqif BAYRAMOV, "Xalq qəzeti"