Oktyabrın 16-da Qafqaz Universitetində 2010-2011-ci dərs ilinə həsr edilmiş "Yüksələn təhsilimizin bayraqdarı - Azərbaycan məktəblisi" adlı tədbir keçirilmişdir.
Milli Məclis deputatlarının, təhsil işçilərinin, tələbələrin, ictimaiyyət nümayəndələrinin iştirak etdikləri tədbirdə çıxış edən təhsil naziri Misir Mərdanov ümummilli lider Heydər Əliyevin gənclərə və onların təhsilinə göstərdiyi diqqət və qayğıdan danışmışdır.
Müasir şəraitdə təhsilin önəmli rolunu xatırladan nazir "Çağ" Öyrətim İşlətmələri Şirkətinin fəaliyyətinin səmərəli olduğunu, təhsilimizə layiqli töhfələr verdiyini vurğulamışdır.
"Çağ" Öyrətim İşlətmələri İdarə Heyətinin sədri Ənvər Özərən ulu öndər Heydər Əliyevin təhsilin inkişafına daim böyük önəm verdiyini bildirmişdir.
Azərbaycan-Türkiyə özəl liseylərində və "Araz" kurslarında təhsilin inkişafı üçün həyata keçirilən tədbirlərdən, qazanılan uğurlardan bəhs edən Ə.Özərən qeyd etmişdir ki, bu il həmin təhsil müəssisələrini bitirmiş gənclərdən 224 nəfəri ali məktəblərə qəbul imtahanlarında 600-dən yuxarı, 5 nəfəri isə 700 bal toplamışdır.
Beynəlxalq fənn olimpiadalarında, bilik müsabiqələrində iştirak edən şagirdlər də uğurlu nəticələr qazanmışlar.
Azərbaycan Respublikasının İnsan Hüquqları üzrə Müvəkkili Elmira Süleymanova və digər çıxış edənlər təhsilimizə göstərilən dövlət qayğısından danışmış, təhsildə nailiyyət qazanan şagirdləri və tələbələri təbrik etmiş, onlara yeni müvəffəqiyyətlər arzulamışlar.
Təhsil müəssisələrinin nailiyyətlərini əks etdirən video-film nümayiş etdirilmişdir.
Azərbaycan-Türkiyə özəl liseylərinin və "Araz" kurslarının beynəlxalq fənn olimpiadalarında və bilik müsabiqələrində uğur qazanan şagirdlərinə, ali məktəblərə qəbul imtahanlarında 600-dən yuxarı bal toplamış məzunlarına və yüksək balla Qafqaz Universitetinə qəbul olunmuş tələbələrə mükafatlar verilmişdir.{nl}