Təhsil Nazirliyi UNESCO-nun 70 illik yubileyi münasibətilə 21 sentyabr -Beynəlxalq Sülh Gününə həsr olunmuş “Sülh naminə birləşək!” mövzusunda respublika rəsm müsabiqəsi təşkil edir.

Nazirlikdən AZƏRTAC-a bildiriblər ki, müsabiqənin keçirilməsinin məqsədi uşaq və gənclərin diqqətini Beynəlxalq Sülh Gününə cəlb etmək, onlara sülh mədəniyyəti, vətənpərvərlik, adət-ənənələrə hörmət ruhu aşılamaq, xüsusi istedada malik uşaqları aşkara çıxarmaq və onların qabiliyyətlərinin inkişaf etdirilməsinə dəstək verməkdir.

Müsabiqə ümumtəhsil və internat məktəblərinin şagirdləri, məktəbdənkənar təhsil müəssisələrinin dərnək üzvləri arasında üç yaş qrupu üzrə təşkil olunacaq.

Müsabiqə əvvəlcə məktəbdaxili və rayon (şəhər) məktəbləri arasında keçiriləcək. Həmin mərhələdə birinci yerin qalibi olan işlər respublika mərhələsinə təqdim olunacaq. Respublika mərhələsində hər yaş qrupu üzrə doqquz qalib iş müəyyənləşdiriləcək.

Yekunda qaliblərin, eyni zamanda, seçilmiş ən yaxşı işlərin kataloqu nəşr olunacaq. Noyabrda isə qaliblərin işlərindən ibarət yekun sərgi və mükafatlandırma mərasimi keçiriləcək.