Oktyabrın 15-də Azərbaycan Milli Elmlər Akademiyasının (AMEA) Rəyasət Heyətində görkəmli şərqşünas alim Aida İmanquliyevanın akademik Ziya Bünyadov adına Şərqşünaslıq İnstitutu tərəfindən çap etdirilmiş "Məqalələr və tərcümələr" adlı kitabının təqdimat mərasimi keçirilmişdir.
İnstitutun direktoru Gövhər Baxşəliyeva bildirmişdir ki, bu gün ölkəmizin hər yerində görkəmli şərqşünas alim, filologiya elmləri doktoru, elm təşkilatçısı, professor Aida xanım İmanquliyevanın anadan olmasının 71 illiyinə həsr olunmuş silsilə tədbirlər keçirilir. On səkkiz il əvvəl dünyasını dəyişmiş Aida xanım keçdiyi 53 illik ömür yolunda həm görkəmli alim kimi dünya şərqşünaslıq elminə böyük töhfələr vermiş, həm də sədaqətli ana, vəfalı həyat yoldaşı kimi Azərbaycan xanımına örnək bir tale yaşamışdır.
Aida İmanquliyevanın bu gün də aktuallığını itirməyən zəngin elmi irsindən danışan G.Baxşəliyeva onun mühacir ərəb ədəbiyyatını dərindən tədqiq etdiyini, şərqşünaslıq elmində silinməz iz qoyduğunu bildirmişdir. Demişdir ki, Aida xanımın tədqiqat əsərləri və tərcümələri ədəbiyyat və mədəniyyət xəzinəmizin zəngin sərvətidir. Qələmə aldığı bütün əsərləri bu insanın əsl elm fədaisi, cəsarətli fikir və söz sahibi, kamil şəxsiyyət olduğunu təsdiq edir.
Məlumat verilmişdir ki, Şərqşünaslıq İnstitutunun ərəb filologiyası şöbəsinin müdiri, filologiya elmləri doktoru Vilayət Cəfərovun tərtib etdiyi "Məqalələr və tərcümələr" kitabında Aida xanımın 53 məqaləsi, müxtəlif kitablara yazdığı rəylər və tərcümələr toplanmışdır.
Vilayət Cəfərov vurğulamışdır ki, "Bakı Çap Evi"nin mətbəsində çap edilmiş 488 səhifəlik bu nəfis tərtibatlı kitab Aida İmanquliyevanın ötən əsrin 60-80-cı illərində qələmə aldığı məqalələrin və ərəb dilindən Azərbaycan dilinə çevirdiyi hekayə və digər əsərlərin ilk toplusudur. Bu məqalə və tərcümələr vaxtilə "Azərbaycan", "Literaturnı Azerbaydjan" jurnallarında, "Ədəbiyyat və İncəsənət" qəzetində, digər mətbu orqanlarda çap olunmuşdur.
Aida xanım İmanquliyevanın elmi fəaliyyətinin əhatə dairəsinin geniş və çoxşaxəli olduğunu diqqətə çatdıran alim qeyd etmişdir ki, onun elmi əsərlərində Qərb və Şərq mədəni ənənələrinin sintezi, yaradıcılıq üslubunun inkişafı və yeni bədii cərəyanların təşəkkül tapması geniş tədqiq edilmişdir. Bu da nəinki ərəb ədəbiyyatının, həmçinin bütün yeni Şərq ədəbiyyatının gələcəkdə tədqiqi üçün çox mühüm zəmin yaratmışdır.
Şərqşünaslıq İnstitutunun böyük elmi işçisi, Aida İmanquliyevanın xatirəsinə həsr olunmuş "Ərəb filologiyası sahəsində tələbələrin və gənc alimlərin arasında ən yaxşı elmi-tədqiqat əsəri" mövzusunda keçirilmiş müsabiqənin qalibi Ruhəngiz Cümşüdlü bildirmişdir ki, bu kitab gənc şərqşünaslara böyük alimin elmi irsini daha dərindən mənimsəməyə imkan yaradacaqdır. Xüsusi vurğulamışdır ki, Aida İmanquliyeva kimi alimlər ölməz tədqiqat əsərləri ilə Qərb ilə Şərqin sivilizasiyalararası toqquşmadan yan keçməsinə, dialoqun və qarşılıqlı anlaşmanın ədavətə, dini fanatizmə qalib gəlməsinə kömək etmişlər.{nl}