Avrasiya Universitetlər Birliyinin (EURAS) prezidenti, Türkiyənin İstanbul Aydın Universitetinin təsisçisi professor Mustafa Aydının rəhbərlik etdiyi nümayəndə heyəti Bakı Ali Neft Məktəbində (BANM) olub.

BANM-in rektoru Elmar Qasımov qonaqlara bu ali təhsil müəssisəsinin fəaliyyət göstərdiyi   üç il ərzində əldə etdiyi uğurlar,  beynəlxalq əlaqələri və tədris prosesinin təşkili haqqında ətraflı məlumat verib. Rektor BANM-də dünya standartlarının tələblərinə cavab verən yüksək ixtisaslı ingilisdilli mütəxəssislər hazırlandığını qeyd edib. E. Qasımov, eyni zamanda,  sözügedən ali məktəbin təhsil və təlim prosesində beynəlxalq standartların tətbiqinə xüsusi önəm verilməsindən və tələbələrin keçdikləri   istehsalat təcrübəsinin təşkilində müxtəlif beynəlxalq şirkətlərin rolundan söhbət açıb.

Rektor  BANM-in Avrasiya Universitetlər Birliyinə üzv universitetlərlə müxtəlif istiqamətli layihələr çərçivəsində əməkdaşlıq etməyə maraqlı olduğunu da diqqətə çatdırıb. 

EURAS-ın prezidenti, professor Mustafa Aydın rəhbəri olduğu   qurum haqqında geniş məlumat verib. M. Aydın EURAS-ın 2008-ci ildə İstanbulda təsis edildiyini və Avropa, Asiya və Yaxın Şərq regionlarından olan 80-dən artıq universiteti  özündə birləşdirdiyini xatırladıb. Professor EURAS-ın həyata keçirdiyi layihələr, üzv universitetlər arasında mübadilə proqramları, birgə elmi tədqiqatlar, nəşrlər,  təqaüdlü proqramlar, yay təcrübəsi haqqında ətraflı danışıb. Bundan başqa, M.Aydın söhbətində  EURAS-ın birləşdirdiyi universitetlər arasında işbirliyinin gücləndirilməsinin və yeni layihələrin reallaşdırılmasının nəzərdə tutulduğunu deyib,   BANM ilə  əməkdaşlıqda maraqlı olduqlarını diqqətə çatdırıb.   Görüşün sonunda tərəflər arasında gələcək əməkdaşlıq imkanları və perspektivləri ətrafında geniş fikir mübadiləsi aparılıb.

Vaqif BAYRAMOV,
“Xalq qəzeti”