Artıq bir həftədir ki, davam edən müsabiqə çərçivəsində 14 fənn üzrə test imtahanı keçirilib. Bu imtahanlarda, ümumilikdə, 12 076 nəfər iştirak edib. İbtidai sinif, musiqi, təsviri incəsənət, texnologiya ixtisasları üzrə iyulun 27-də başlayan test imtahanları bu gün yekunlaşacaq.

Təhsil Nazirliyindən aldığımız məlumatda deyilir ki, indiyədək keçirilən imtahanların nəticələrinə əsasən, 1 733 nəfər seçdiyi vakant yeri tutmaq hüququ qazanaraq müsabiqənin müsahibə mərhələsinə buraxılıb. Müsahibəyə buraxılanların 186 nəfəri Azərbaycan dili və ədəbiyyatı, 138 nəfəri ingilis dili, 39 nəfəri rus dili, 5 nəfəri rus dili və ədəbiyyatı, 9 nəfəri alman dili, 10 nəfəri fransız dili, 145 nəfəri riyaziyyat, 153 nəfəri informatika, 144 nəfəri fizika, 185 nəfəri kimya,  149 nəfəri biologiya, 261 nəfəri coğrafiya, 152 nəfəri tarix, 157 nəfəri fiziki tərbiyə müəllimləridir. Müsahibə mərhələsi test imtahanları başa çatdıqdan sonra - iyulun 30-dan avqustun 3-dək keçiriləcək.

Müsabiqənin nəticələrinə əsasən, boş qalan yerlərə avqustun 5-dən sonra əlavə yerləşdirmə həyata keçiriləcək. Əlavə yerləşdirmədə keçid balı toplamış, lakin vakant yer tutmamış namizədlər iştirak edə bilərlər.

Samirə ƏLİYEVA,
“Xalq qəzeti”