İ.M.Seçenov adına Birinci Moskva Dövlət Tibb Universitetinin Bakı filialı 2015/2016-cı tədris ili üçün müalicə işi ixtisası üzrə (peşəsi - həkim, rus bölməsi) tələbə qəbulu elan edir.

Tələbə Qəbulu üzrə Dövlət Komissiyasından (TQDK) AZƏRTAC-a bildiriblər ki, ixtisas üzrə yüz nəfərin qəbul olunması planlaşdırılır. Azərbaycan vətəndaşları üçün təhsil ödənişsizdir.

İ.M.Seçenov adına Birinci Moskva Dövlət Tibb Universitetinin yaratdığı Qəbul Komissiyası tərəfindən aparılan qəbul imtahanlarında yalnız TQDK-nın IV ixtisas qrupu üzrə keçirdiyi test imtahanlarında 350 və daha artıq bal toplayan abituriyentlər iştirak edə bilərlər. Tədris rus dilindədir. Müsabiqə rus və Azərbaycan bölmələrindən olan abituriyentlər üçün birgə aparılır.

Qəbul imtahanı rus dili (testlə) və  kimya (testlə) fənləri üzrə aparılacaq.

Müsabiqə İ. M. Seçenov adına Birinci Moskva Dövlət Tibb Universitetinin yaratdığı Qəbul Komissiyasının keçirdiyi imtahanların nəticələri əsasında aparılacaq.

Qəbul imtahanlarında iştirak etmək istəyənlər universitetin qəbul komissiyasına aşağıdakı sənədləri təqdim etməlidirlər:

1. TQDK tərəfindən keçirilən test imtahanının nəticəsi haqqında arayış;

2. Tam orta təhsil haqqında sənədin əsli (attestat);

3. Şəxsiyyət vəsiqəsi;

4. Oğlanlar üçün çağırış məntəqəsinə təhkim edilmə haqqında vəsiqə;

5. 3x4 sm ölçüdə 8 ədəd fotoşəkil.

İ.M.Seçenov adına Birinci Moskva Dövlət Tibb Universitetinin Bakı filialına sınaqlardan keçməyən abituriyentlər heç bir məhdudiyyət qoyulmadan TQDK tərəfindən digər ali təhsil müəssisələrinə keçirilən müsabiqədə iştirak edə bilərlər.

Filialın tədris fəaliyyəti İ.M.Seçenov adına Birinci Moskva Dövlət Tibb Universitetinin tədris plan və proqramları əsasında həyata keçirilir. Tədris, əsasən, bu ali məktəbin müəllimləri tərəfindən aparılacaq.

Filialın məzunlarına İ.M.Seçenov adına Birinci Moskva Dövlət Tibb Universitetinin diplomu təqdim ediləcək.

Sənədlər iyulun 21-22-də saat 10.00-dan 18.00-dək qəbul ediləcək.

Rus dili fənnindən məsləhət saatı iyulun 22-də, imtahan iyulun 23-də keçiriləcək. İmtahanın nəticələri iyulun 24-də elan ediləcək.

Kimya fənnindən məsləhət saatı iyulun 24-də, imtahan isə iyulun 25-də keçiriləcək.  İmtahanın nəticələri iyulun 26-da məlum olacaq.

Qəbul imtahanlarının proqramları və fənlər üzrə testlərinin nümunələri ilə http://www.mma.ru/education/pocty/pkur/progran/  linki vasitəsilə tanış olmaq mümkündür.  

Ünvan: Bakı şəhəri, İstiqlaliyyət küçəsi, 6(Azərbaycan Dövlət İqtisad Universitetin əsas binası).

Əlaqə telefonu: Moskvada

+7 (499) 248-17-88 ;

+7(495) 609-14-00;

Bakıda146; +(994) 12- 492-25-06

E-mail: [email protected]