Azərbaycan Dövlət İqtisad Universitetinin MBA Departamentinin MBA Proqramı respublikada ilk dəfə olaraq, EFMD (European Foundation for Management Development (Busines School Accreditation)) təşkilatının tam üzvlüyünə qəbul edilib.

Baş ofisi Belçikanın Brussel şəhərində yerləşən bu təşkilatın əhatə dairəsinə  ABŞ, Böyük Britaniya, Fransa, Almaniya, İspaniya, İsveçrə də daxil olmaqla, 81 ölkədən 800-dən artıq akademik təşkilat, biznes, dövlət xidməti və məsləhət xidməti qurumları daxildir. EFMD idarəetmənin inkişafı sahəsində informasiya mübadiləsi, tədqiqatların aparılması, innovativ ideyaların və təlim metodlarının işlənib hazırlanması, bu sahə üzrə qabaqcıl təcrübələrin mübadiləsi, biznes təhsil müəssisələrinin rasionallaşdırılması üzrə yeganə təşkilatdır.

Qlobal miqyasda tanınan bu təşkilat dünyanın aparıcı təhsil sistemlərinin standartlarına cavab verən  biznes məktəblərinin, onların biznes təhsili proqramlarının, korporativ universitetlərin və texnologiyalara əsaslanan tədris proqramlarının  qiymətləndirilməsi üzrə akkreditasiya xidmətlərini həyata keçirir.

ADİU-nun MBA Proqramının EFMD-yə tam üzv olması ali təhsil müəssisəsinin biznesin idarə edilməsi üzrə proqram heyəti və magistrların mübadiləsinə, bilik paylaşımına  və dünyanın qabaqcıl universitetləri ilə əməkdaşlığa  geniş imkanlar yaradır.

Elnarə ÖMƏROVA