Oktyabrın 7-də Bakı Ekspo Sərgi və Toplantı Mərkəzində Təhsil Nazirliyinin dəstəyi, "İteca Caspian" MMC və onun tərəfdaşı "İTE Group" PLC şirkətlərinin təşkilatçılığı ilə "Education&Career" 4-cü Azərbaycan Beynəlxalq təhsil və karyera sərgisi işə başlamışdır.
Sərginin açılışında təhsil naziri Misir Mərdanov çıxış edərək, beynəlxalq tədbirin əhəmiyyətindən danışmışdır. Bildirilmişdir ki, sayca 4-cü olan builki sərgidə 15 ölkədən 90-dan çox təşkilat və şirkət iştirak edir. Təhsil və karyera sərgisinin coğrafiyası və əhatə dairəsi ilbəil genişlənir. Ölkəmizdə 2009-cu ildə keçirilmiş 3-cü Beynəlxalq təhsil və karyera sərgisinə dünyanın 12 ölkəsindən 48 təşkilatın və şirkətin qatıldığını xatırlasaq, bu prosesin yüksələn xətt üzrə inkişaf etdiyini görərik.
Nazir diqqətə çatdırmışdır ki, sərgidə Azərbaycan, Türkiyə, Böyük Britaniya, Macarıstan, Almaniya, İspaniya, Kanada, Rusiya, ABŞ, İsveçrə və digər ölkələri təmsil edən təhsil müəssisələri iştirak edirlər. Sərgiyə ilk dəfə olaraq Ankara, İstanbul və İzmirin 15 təhsil müəssisəsini özündə birləşdirən Türk Milli Universitetlər Qrupu da qatılmışdır. Böyük Britaniyanın nüfuzlu təhsil ocaqlarında təhsil almaq imkanı isə İngiltərənin London, Edinburq, Notinhem, Suffolk və digər şəhərlərinin 14 universitet və məktəbi tərəfindən təqdim olunur. Sərgidə Rusiya ali təhsil müəssisələri qrupu Moskva və Sankt-Peterburq şəhərlərinin bir sıra nüfuzlu universitetləri də daxil olmaqla, bu ölkənin 30-a yaxın təhsil müəssisəsinin rəsmi nümayəndəsi sayılan bir şirkətin stendində yer almışdır.
M.Mərdanov vurğulamışdır ki, Azərbaycanda təhsil almaq imkanı respublikanın paytaxt və regionlarının dövlət və özəl ali təhsil müəssisələri tərəfindən təqdim edilir. Amma biz bu sərgidə iştirakçılara respublikamızın təhsil müəssisələrinin bütövlükdə potensialını göstərə bilmirik. İnanıram ki, yaxın gələcəkdə buna da nail olacağıq.
Tədbirdə çıxış edən "Iteca Caspian" şirkətinin direktoru Fərid Məmmədov sərginin qarşılıqlı əməkdaşlıq və gənclərin hərtərəfli təhsil almaları üçün böyük maraq doğuracağını diqqətə çatdırmışdır.
Bildirilmişdir ki, sərgi proqramını tələbələr və gənc mütəxəssislər üçün karyeranın qurulması üzrə seminarlar və təkmilləşdirmə kursları ilə davam etdirəcəkdir. Sərgidə ali peşə orta və əlavə təhsil proqramları, eləcə də tədris vəsaitləri üzrə yeni texnologiyalar və xaricdə təhsil proqramlarının geniş spektri nümayiş olunacaqdır.
Əminliklə vurğulanmışdır ki, sərgi 60-dan çox ödənişli və ödənişsiz fakültələri, kursları, habelə ən müxtəlif ixtisaslar üzrə proqramları özündə birləşdirən 90-dan çox təhsil müəssisəsi və təşkilatını təqdim etməklə, öz beşillik yubileyi ərəfəsində "Təhsilini seç-gələcəyini təmin et!" şüarını layiqli şəkildə doğruldacaqdır.
Sonra iştirakçılar sərgi ilə yaxından tanış olmuşlar.
Oktyabrın 9-dək davam edəcək sərgidə yerli şirkətlərin təqdim etdikləri məktəb avadanlıqları, idman qurğuları böyük maraq doğurmuşdur.
AzərTAc{nl}