İyunun 1-də Azərbaycan Dövlət İqtisad Universitetində (ADİU) “Məzun günü” keçirilib. Tədbirdə universitetin professor-müəllim heyəti və tələbələrlə yanaşı, Qiymətli Kağızlar üzrə Dövlət Komitəsinin sədri Rüfət Aslanlı, təhsil nazirinin müavini Ceyhun Bayramov, Hesablama Palatasının sədri  Vüqar Gülməmmədov, “Bank Standart”ın Müşahidə Şurasının sədri Kamal İbrahimov da iştirak ediblər.

Tədbirdə çıxış edən ADİU-nun rektoru, professor Ədalət Muradov məzunları təbrik edərək onlara gələcək fəaliyyətlərində uğurlar arzulayıb. Məzunlara  universitetdə aldıqları biliklərlə kifayətlənməyib yenilikləri izləməyi, daim inkişaf etməyi tövsiyə edib.

Sonra ADİU-nun fəxri məzunları Rüfət Aslanlı, Ceyhun Bayramov və Vüqar Gülməmmədov tələbəlik illərini xatırlayaraq, məzunlarla öz uğur formullarını paylaşıblar. Ölkənin yüksək bilik və bacarıqlı gənclərə daim ehtiyacı olduğunu vurğulayan qonaqlar məzunlara gələcək fəaliyyətlərində uğurlar arzulayıblar.

Mərasimdə universitetin ən yüksək bal toplayan məzunu Zeynəb Dadaşovaya hədiyyə təqdim olunub. Universitet himninin sədaları altında bütün məzunlara rəmzi diplomlar təqdim edilib.

Tədbirin davamında “Məzun” filmi nümayiş etdirilib. Məzunlar posterə barmaq izlərini vurub və “Xatirə kitabı”na ürək sözlərini yazıblar.  Sonra  mantiya geyinən məzunların ənənəvi papaqatma mərasimi keçirilib.

Tədbir konsert proqramı ilə davam edib.

Elnarə  ÖMƏROVA