Azərbaycan Dövlət İqtisad Universitetinin (ADİU) tələbələri dəyərli töhfə almışlar. Rus geoiqtisadiyyat məktəbinin banisi, Rusiya Federasiyası İqtisadi İnkişaf və Ticarət Nazirliyi yanında Ümumrusiya Xarici Əlaqələr Elmi-Tədqiqat İnstitutu  Geoiqtisadiyyatın Strateji Tədqiqatları Mərkəzinin rəhbəri E.Q.Koçetovun “Geoiqtisadiyyat” dərsliyi Azərbaycan dilinə tərcümə  edilib.

Kitabı ana dilimizə ADİU-nun beynəlxalq iqtisadiyyat kafedrasının (ingilis dilli) müdiri, iqtisad üzrə fəlsəfə doktoru Anar Rzayev çevirib. Dərslikdə sürətlə dəyişən dünyanın formalaşma mənbəyi və prinsipləri, nəzəri və metodoloji bünövrəsi, gələcək dəyişikliklərin fundamental əsaslarının fəlsəfi təsəvvürü yığcam şəkildə verilib. Eyni zamanda, dünya elm və təhsil təcrübəsində ilk dəfə olaraq qlobal bəşəriyyətin canlı mənzərəsi təsvir edilib ki, burada insanın gerçək və rasional fəaliyyəti — geoiqtisadiyyat mühüm yer tutur. Geoiqtiadiyyat qloballaşmanın mahiyyətini təşkil edir və yeni yüzillikdə bəşəriyyətin tarixi inkişafının bütün gedişini, XX əsrdəki iqtisadi insandan (homo economicus) XXI əsrin geoiqtisadi insanına (homo geoeconomicus) harmonik keçidini müəyyən edir.

Geoiqtisadiyyat iqtisad təmayüllü ali təhsil müəssisələrində “Dünya iqtisadiyyatı” ümumi kursu daxilində xüsusi fənn kimi tədris olunan müstəqil iqtisadi-siyasi kursdur.

Elnarə ÖMƏROVA